ضلع بٹگرام کے علاقے نیل بند میں کلاؤڈ برسٹ کے باعث پیدا ہونے والے سیلابی ریلے میں بہہ جانے والے 10 افراد کی لاشیں شملائی مندروالی کے مقام سے بازیاب کر لی گئی ہیں۔
ریسکیو حکام کے مطابق 18 دیگر افراد کی تلاش کے لیے امدادی کارروائیاں جاری ہیں۔
اسسٹنٹ کمشنر بٹگرام کے مطابق نیل بند گاؤں ضلع بٹگرام اور مانسہرہ کی سرحد پر واقع ہے، جہاں گزشتہ رات شدید بارش اور کلاؤڈ برسٹ کے نتیجے میں سیلابی صورتحال پیدا ہوئی تھی۔ انہوں نے مزید بتایا کہ اس قدرتی آفت کی وجہ سے 5 مکانات تباہ ہو گئے ہیں۔
دوسری جانب وزیراعلیٰ خیبرپختونخوا علی امین گنڈاپور نے کمشنر ہزارہ اور ڈی سی بٹگرام سے ٹیلی فون پر رابطہ کر کے ضلعی حکام کو فوری طور پر جائے وقوعہ پہنچنے اور ریسکیو کارروائیوں کی نگرانی کرنے کی ہدایت کی ہے۔
وزیراعلیٰ نے کہا کہ لاپتہ افراد کی تلاش کے لیے تمام دستیاب وسائل اور افرادی قوت بروئے کار لائی جائے تاکہ ریسکیو آپریشن مؤثر اور بروقت ہو۔
