کراچی کے علاقے ڈیفنس خیابانِ مجاہد میں افسوسناک واقعہ پیش آیا جہاں ماں نے مبینہ طور پر اپنے دو بچوں کو قتل کر دیا۔ پولیس کے مطابق ملزمہ کو گرفتار کر لیا گیا ہے اور واقعے کی تحقیقات جاری ہیں۔ بچوں کے والد کا کہنا ہے کہ خاتون ذہنی بیماری میں مبتلا تھی۔
ایس ایس پی ساؤتھ مہروز علی کے مطابق ملزمہ کی شادی 9 سال قبل ہوئی تھی، تاہم کچھ عرصہ پہلے میاں بیوی میں علیحدگی ہو گئی، جس کے بعد بچے اپنے والد کے ساتھ رہائش پذیر تھے۔ عدالت میں بچوں کی حوالگی کا مقدمہ زیرِ سماعت تھا۔
پولیس کے مطابق طے شدہ معمول کے مطابق چھٹی کے دن بچے اپنی والدہ سے ملاقات کے لیے آتے تھے۔ گزشتہ رات بھی دونوں بچے والدہ کے پاس تھے جب یہ واقعہ پیش آیا۔ حکام کا کہنا ہے کہ خاتون کے ذہنی مسائل ہی علیحدگی کی بڑی وجہ بنے تھے۔
