یو جی پی آر 14 اگست 2025:
یونیورسٹی آف گوادر نے پاکستان کا 78واں یومِ آزادی اور “مارکۂ حق” قومی یکجہتی اور جذبے کے ساتھ منایا۔ دن کا آغاز پاک چائنا ٹیکنیکل اینڈ ووکیشنل انسٹیٹیوٹ، یونیورسٹی آف گوادر میں پرچم کشائی کی پُروقار تقریب سے ہوا۔
تقریب کا باقاعدہ آغاز جامعہ گوادر کے مین بلاک کے مرکزی سیمینار ہال میں تلاوتِ کلامِ پاک اور قومی ترانے سے کیا گیا۔ اس موقع پر یومِ آزادی اور مارکۂ حق کے حوالے سے تقریری مقابلہ ہوا، جس میں یونیورسٹی آف گوادر اور ڈگری کالج گوادر کے طلبہ و طالبات نے پرجوش تقاریر پیش کر کے اپنے گہرے قومی جذبے اور ملکی اقدار سے وابستگی کا اظہار کیا۔
مہمانِ خصوصی وائس چانسلر پروفیسر ڈاکٹر عبدالرزاق صابر نے اپنے خطاب میں کہا کہ 14 اگست صرف ایک تاریخی دن نہیں بلکہ ایک نئے عزم، حوصلے اور قربانیوں کی یاد دہانی کا دن ہے۔ یہ دن ہمیں اُن بے مثال قربانیوں کی یاد دلاتا ہے جو ہمارے بزرگوں نے پاکستان کے قیام کے لیے دیں۔ انہوں نے کہا کہ آزادی کی حقیقی اہمیت اُس وقت مکمل ہوتی ہے جب ہم اسے ملک کی تعمیر و ترقی اور عوام کی فلاح و بہبود کے لیے استعمال کریں۔
وائس چانسلر نے مزید کہا کہ اس خطے میں امن، استحکام اور ترقی کے لیے ہر فرد کو اپنی ذمہ داری نبھانی ہوگی، بالخصوص نوجوان نسل کو معیاری تعلیم، اور معاشرتی اقدار کو اپناتے ہوئے پاکستان کے روشن مستقبل کی ضمانت دینا ہوگی۔ انہوں نے طلبہ پر زور دیا کہ وہ اپنی صلاحیتوں اور محنت کو ملک کی ترقی کے لیے بہترین انداز میں بروئے کار لائیں، تاکہ پاکستان عالمی سطح پر ترقی یافتہ ممالک کی صف میں شامل ہو سکے۔
انہوں نے اس بات پر بھی زور دیا کہ ہمیں اتحاد، برداشت اور باہمی احترام کو فروغ دینا چاہیے تاکہ ایک مضبوط، خوشحال اور پرامن پاکستان کی تعمیر ممکن ہو۔ وائس چانسلر نے شہداء “مارکۂ حق” کو خراجِ عقیدت پیش کرتے ہوئے کہا کہ ان کی قربانیاں ہمیشہ یاد رکھی جائیں گی اور ہم سب پر یہ ذمہ داری ہے کہ اُن کے مشن کو آگے بڑھائیں.
تقریب کے آخر میں تقریری مقابلے کے نمایاں طلبہ کو وائس چانسلر گوادر یونیورسٹی پروفیسر ڈاکٹر عبدالرزاق صابر نے شیلڈز پیش کی
اس موقع پر یونیورسٹی انتظامیہ، ڈینز، یونیورسٹی کے فیکلٹی ممبران، ڈگری کالج گوادر اور انٹر کالج پشکان کے پرنسپل صاحبان اور اساتذہ اور بڑی تعداد میں طلبہ نے شرکت کی اور قومی وقار کے ساتھ اس دن کو منایا۔
