بھارتی حکومت ایک بار پھر سوشل میڈیا صارفین کے نشانے پر آ گئی ہے۔ اس بار تنقید کا محور ہے حاضر سروس فوجی افسران کی ٹی وی شو میں شرکت اور نام نہاد فوجی آپریشن کی کہانی پیش کرنا۔
بھارت کے یومِ آزادی 15 اگست کے موقع پر نشر ہونے والے مشہور شو ’’کون بنے گا کروڑ پتی (KBC)‘‘ کی نئی قسط کا ٹیزر جاری ہوتے ہی سوشل میڈیا پر بحث چھڑ گئی۔
اس قسط میں آپریشن سندور میں حصہ لینے والی حاضر سروس خواتین افسران، جیسے کرنل صوفیہ قریشی، ونگ کمانڈر ویومیکا سنگھ اور کمانڈر پریرنا دیوستھالی کو بطور مہمان مدعو کیا گیا۔ ٹیزر میں شو کے میزبان امیتابھ بچن کو فوجی افسران کا استقبال کرتے اور آپریشن سندور کے قصے بیان کرتے دکھایا گیا۔
سوشل میڈیا صارفین اس اقدام کو مودی حکومت کی پی آر سٹریٹجی قرار دے رہے ہیں اور حکومت پر الزام لگا رہے ہیں کہ وہ ٹی وی شو کے ذریعے قوم پرست جذبات کو بھڑکا رہی ہے۔ کئی صارفین سوال کر رہے ہیں کہ کیا واقعی ٹی وی شو ایسا مناسب پلیٹ فارم ہے جہاں ملک کی افواج کو دکھا کر حکومت کا دفاع کیا جائے۔
