لیجنڈری اداکار امیتابھ بچن نے اپنی آمدنی سے والدین کو پہلی بار ریسٹورنٹ لے جانے کے یادگار تجربے کا ذکر کیا ہے۔
مشہور شو “کون بنے گا کروڑپتی” کے 17ویں سیزن کی میزبانی کرنے والے امیتابھ بچن نے 12 اگست کو شو کے پہلے ایپی سوڈ میں اپنی جوانی کا وہ لمحہ بتایا جب انہوں نے پہلی بار اپنی کمائی سے والدین کو کھانے پر باہر لے جانے کا موقع بنایا۔
پروگرام کے دوران دہلی کے وجے نامی امیدوار نے کہا کہ ان کے والد روزانہ مزدوری کرتے ہیں اور وہ چاہتے ہیں کہ اپنے والدین کو بہتر زندگی فراہم کریں، اسی لیے وہ اس شو میں حصہ لے رہے ہیں۔
وجے نے بتایا کہ 2024 میں انہوں نے اپنی والدین کی شادی کی سالگرہ پر پہلی بار انہیں ریسٹورنٹ لے جا کر کھانا کھلایا اور کہا کہ قیمت کی فکر نہ کریں، بس جو چاہیں آرڈر کریں۔
اس پر امیتابھ بچن نے بتایا کہ انہوں نے کالج کے بعد پہلی کمائی سے والدین کو دہلی کے مشہور ریسٹورنٹ موتی محل لے جا کر کھانا کھلایا۔ وہ یاد کرتے ہوئے بتاتے ہیں کہ اس وقت وہ بہت ڈرے ہوئے تھے، فکر تھی کہ لوگ انہیں کیسے دیکھیں گے، کپڑے کیسی ہیں اور کیا کہیں گے، مگر مقصد صرف اپنے والدین کو خوش کرنا تھا۔
امیتابھ بچن نے کہا کہ یہ جذبات ہر اس شخص کے ذہن میں آتے ہیں جو پہلی بار ایسے موقع پر جاتا ہے، اور وہ وجے کی کیفیت کو بخوبی سمجھ سکتے ہیں۔
