محکمہ موسمیات نے پیشگوئی کی ہے کہ 17 اگست سے ملک میں بارشوں کا نیا سلسلہ داخل ہوگا، جو 21 اگست تک جاری رہنے کا امکان ہے۔ اس دوران پنجاب اور اسلام آباد سمیت مختلف علاقوں میں گرج چمک کے ساتھ بارش متوقع ہے۔
تفصیلات کے مطابق 18 سے 21 اگست تک راولپنڈی، مری، چکوال، اٹک، جہلم اور میانوالی میں تیز ہواؤں اور گرج چمک کے ساتھ بارش ہوگی۔ اسی عرصے میں بھکر، خوشاب، سرگودھا، گجرات، گوجرانوالہ اور لاہور میں بھی بارش کا امکان ہے۔ سیالکوٹ، فیصل آباد، ساہیوال، اوکاڑہ، ڈیرہ غازی خان، بہاولپور اور رحیم یار خان میں بھی بارش متوقع ہے، جبکہ گلگت بلتستان کے مختلف حصوں میں گرج چمک کے ساتھ بارش ہونے کی پیشگوئی کی گئی ہے۔
خیبر پختونخوا میں دیر، چترال، سوات، کوہستان، شانگلہ، بٹگرام، مانسہرہ، ایبٹ آباد، ہری پور، بنوں، لکی مروت، وزیرستان، ٹانک اور ڈیرہ اسماعیل خان بارش سے متاثر ہو سکتے ہیں۔ بلوچستان کے بارکھان، لورالائی، زیارت، سبی، ژوب، قلعہ سیف اللہ، خضدار، لسبیلہ، آواران، کیچ، گوادر اور پنجگور میں بھی بارش کا امکان ظاہر کیا گیا ہے۔
سندھ میں تھرپارکر، عمرکوٹ، بدین، سجاول، ٹھٹہ، حیدرآباد، میرپور خاص، ٹنڈوالہ یار، ٹنڈو محمد خان، سانگھڑ، سکھر، لاڑکانہ، خیرپور اور دادو میں بھی گرج چمک کے ساتھ بارش کا امکان ہے۔
محکمہ موسمیات نے خبردار کیا ہے کہ خیبرپختونخوا، کشمیر، گلگت بلتستان اور بلوچستان کے کچھ علاقوں میں ندی نالوں میں طغیانی اور فلیش فلڈنگ کا خدشہ ہے، جبکہ ڈیرہ غازی خان اور مشرقی بلوچستان میں پہاڑی نالوں میں طغیانی کا خطرہ موجود ہے۔ مری، کشمیر اور دیگر پہاڑی علاقوں میں لینڈ سلائیڈنگ کے امکانات بھی ہیں۔
مزید برآں سندھ اور بلوچستان کے نشیبی علاقوں میں اربن فلڈنگ کا خطرہ ہے۔ محکمہ موسمیات نے تمام متعلقہ اداروں کو الرٹ رہنے اور بروقت حفاظتی اقدامات کرنے کی ہدایت کی ہے۔
