گلگت بلتستان کے ضلع ہنزہ میں گلمت گوجال نالے میں اچانک آنے والے سیلابی ریلے نے خوف و ہراس پھیلا دیا۔ واٹر چینل پر کام کرنے والے پچاس سے زائد مزدور بروقت بچ نکلے اور اپنی جانیں محفوظ بنانے میں کامیاب ہوئے۔
سیلاب کے ساتھ آنے والے بھاری پتھروں نے شاہراہ قراقرم کو متعدد مقامات پر بلاک کر دیا، جس سے مسافر راستوں میں پھنس گئے۔
ترجمان گلگت بلتستان حکومت فیض اللّٰہ فراق کے مطابق دریائے ہنزہ میں پانی کا بہاؤ خطرناک حد تک بڑھ گیا ہے، جس کے نتیجے میں واٹر چینلز، کھڑی فصلیں اور کئی مکانات کو نقصان پہنچا ہے۔
انہوں نے بتایا کہ بلتستان کے علاقے شگر میں بھی سیلابی پانی نے زرعی زمینات اور درخت بہا دیے ہیں اور سڑکوں کی مرمت و بحالی کا کام جلد شروع کیا جائے گا۔
ترجمان کا کہنا تھا کہ گلگت بلتستان اس وقت شدید ترین سیلابی صورتحال کا سامنا کر رہا ہے، جبکہ پہاڑوں سے پتھروں کے گرنے کا سلسلہ شاہراہ ریشم پر مسلسل جاری ہے۔
فیض اللّٰہ فراق نے مزید کہا کہ حکومت نے ہنزہ کی ضلعی انتظامیہ کو فوری طور پر امدادی سرگرمیاں تیز کرنے کی ہدایت جاری کر دی ہے۔
