بھارتی ریاست اتراکھنڈ کے گاؤں دھرالی میں کلاؤڈ برسٹ اور بھاری لینڈ سلائیڈنگ کے باعث بڑے پیمانے پر تباہی ہوئی ہے، جس میں ہلاکتوں کی تعداد 70 تک پہنچ گئی ہے۔
غیر ملکی میڈیا کے مطابق شدید بارشوں کے بعد مٹی اور ملبے کے تیز ریلے نے متعدد گھروں کو بہا دیا، جب کہ علاقے میں درجنوں افراد اب بھی لاپتہ ہیں۔ حکام کے مطابق لاپتہ افراد کی تعداد 68 ہے جن میں 44 بھارتی شہری، 22 نیپالی باشندے اور 9 فوجی اہلکار شامل ہیں۔
ریسکیو ٹیمیں متاثرہ علاقوں میں لاشوں اور زندہ بچ جانے والوں کی تلاش میں مصروف ہیں، تاہم مسلسل بارش اور دشوار گزار پہاڑی راستے امدادی کارروائیوں میں رکاوٹ بنے ہوئے ہیں۔
