ملک کے مشہور گلوکار عاطف اسلم کے والد کا انتقال ہو گیا ہے۔ معلومات کے مطابق، عاطف اسلم کے والد لاہور میں وفات پا گئے، وہ کچھ عرصے سے بیمار تھے اور چند ماہ قبل انہیں دل کا دورہ بھی پڑا تھا۔ مرحوم کی نماز جنازہ آج بعد از عصر ویلنشیا ٹاؤن میں ادا کی جائے گی۔
عاطف اسلم اس وقت مختلف شہروں میں آزادی شو کے سلسلے میں مصروف تھے اور آج انہیں الحمراء لاہور میں بھی پرفارم کرنا تھا، تاہم والد کے انتقال کی وجہ سے ان کا پروگرام منسوخ کر دیا گیا ہے۔ اس دکھ کی خبر پر شوبز انڈسٹری اور گلوکار کے مداحوں کی جانب سے تعزیت کا سلسلہ جاری ہے۔
