کینیڈا کا صوبہ برٹش کولمبیا آبشاروں کا گھر ہے
صرف ایک پارک میں 41 آبشاروں کا ہونا ریکارڈ ہے
Cascade آبشار کے قدرتی حسن کے نظاروں کا جواب نہیں
کینیڈا ہائیڈرو الیکٹرک پیدا کرنے والا دنیا کا تیسرا بڑا ملک ہے
مسرور احمد مسرور
کینیڈا دنیا بھر میں لاکھوں جھیلوں کی موجودگی کے حوالے سے اپنی مخصوص شناخت کا حامل ملک ہونے کے ساتھ آبشاروں کی تعداد کے معاملے میں بھی سب سے آگے نظر آتا ہے۔ یہ نہایت ہی خوبصورت آبشاریں کینیڈا کے قدرتی حسن میں دلکشی پیدا کرنے کا بڑا ذریعہ ہیں۔ ہم نے اپنے اس مطالعاتی اور مشاہداتی دورے میں قدرت کے حسین نظاروں کا لطف لینے کے لیے جھیلوں کا رخ کرنے کے بعد آبشاروں کی تفریح کرنے اور وہاں سے قدرت کے حسین نظاروں سے محظوظ ہونے کا پروگرام چاک آؤٹ کیا اور گزشتہ اتوار کے روز عاطف زبیر اور عمران زبیر اپنی فیملیز کے ساتھ ہمیں یہاں سے ساٹھ ستر کلو میٹر کے فاصلے پر واقع Cascade نام کی آبشار پر لے جا پہنچے۔ یہاں یہ بات بھی بتاتے چلیں کہ کینیڈا کا یہ اہم صوبہ برٹش کولمبیا آبشاروں کی موجودگی کے حوالے سے بھی مالا مال صوبہ مانا جاتا ہے، لاتعداد آبشاریں BC میں موجود ہیں اور یہ آبشار ایک خوبصورت پکنک اسپاٹ ہے۔
Cascade آبشار پہنچنے کے بعد پارکنگ کے حصول کا دشوار مرحلہ سامنے آیا کیوں کہ اتنی پبلک اس اسپاٹ پر موجود تھی کہ کار پارکنگ کا ملنا محال ہو رہا تھا، کافی تگ و دو کے بعد یہ مرحلہ طے پایا۔
برٹش کولمبیا میں آبشاروں کی تعداد کا اندازہ اس بات سے لگایا جا سکتا ہے کہ یہاں ایک ہی ویل گرے پراونشل پارک میں 41 آبشاریں ہیں جبکہ دوسری آبشاروں کا حساب ہی نہیں۔
Cascade نامی آبشار نہایت ہی خوبصورت آبشار ہے، آبشار سے قدرت کے دلکش نظاروں کا حسن قابل دید اور ذہن کو حیران کر دینے کا موجب ہوتا ہے یہ پانی کی لہریں تقریباً 30 میٹر اونچی آ بشار سے ایک پتھریلے تالاب میں گرتی ہے۔
یہاں ایک Suspension Bridge بھی ہے جسے کراس کرکے ایک ایسے مقام تک پہنچا جا سکتا ہے جہاں سے آبشار کے بہنے کا خوبصورت منظر آنکھوں میں سمایا جا سکتا ہے۔ پارکنگ سے آبشار تک کا 300 میٹر راستہ طے کرنا بہت کٹھن اور دشوار طلب ہے، خاص کر ہم جیسے 70 پلس لوگوں کے لیے۔ لیکن یہ عمران زبیر کا کمال تھا کہ وہ ہمت دلاتے ہوئے آبشار کے اس پوائنٹ تک لے گئے جہاں سے آبشار کے تیزی سے گرتے ہوئے پانی کے حسن آمیز منظر سے لطف اندوز ہوا جاسکتا تھا۔ چڑھائی پر اوپر جانے اور واپس نیچے آنے میں بہت زور لگانا پڑا۔
یہ آبشار فریزر ویلی میں وینکوور سے تقریباً ڈیڑھ گھنٹے کی ڈرائیو پر تھی۔ آبشار سے ملحقہ پارک میں پکنک منانے والوں کے لیے بیٹھنے اور کھانے کی میزوں کے ساتھ دوسری تمام سہولتیں موجود تھیں۔ آبشار کے علاقے میں جنگلاتی راستے جہاں اونچے اونچے درختوں کا طویل سلسلہ بھی لوگوں کو بہت بھلا لگتا ہے۔
قدرتی مناظر کی تصاویر اتارنے کے لیے آبشار کے تمام پوائنٹس پسندیدہ مانے جاتے ہیں، مقامی لوگوں کے ساتھ ساتھ سیاحوں کے لیے یہ آبشار اور قریب سے دیکھنے کے تمام پوائنٹس بہت زیادہ کشش رکھتے ہیں۔
اس Cascade آبشار کی سیاحتی اہمیت اپنی جگہ پر تسلیم شدہ ہے لیکن اس آبشار سے بجلی کی پیداوار کے حوالے سے جو حقائق سامنے آئے وہ بھی اپنی جگہ نہایت اہمیت کے حامل ہیں کیونکہ یہ آبشار ہائیڈرو الیکٹرک کا اہم ذریعہ بھی ہے جو ایک پلس پوائنٹ ہے۔ ہائیڈرو الیکٹرک وہ بجلی ہے جو آبی توانائی سے پیدا کی جاتی ہے، جو پانی کے گرنے یا بہنے کی قوت ثقل سے پیدا ہوتی ہے۔
ہائیڈرو الیکٹرک سٹی دنیا کے قدیم ترین توانائی کے ذرائع میں سے ایک ہے جو بہتے پانی کے پہیے یا ٹربائن گھمانے سے پیدا ہوتی ہے۔ یہ ذریعہ نہایت صاف اور قابل تجدید توانائی پیدا کرتا ہے اور کئی نسلوں تک چل سکتا ہے۔ ہائیڈرو دنیا کا سب سے بڑا قابل تجدید بجلی کا ذریعہ ہے۔ برٹش کولمبیا میں زیادہ تر بجلی ہائیڈرو الیکٹرک سٹی سے حاصل کی جاتی ہے۔
برٹش کولمبیا دنیا کے سب سے بڑے ہائیڈرو الیکٹرک وسائل رکھنے والے چند مما لک میں سے ایک ہے جب کہ کینیڈا ہائیڈرو الیکٹرک سٹی پیدا کرنے والا دنیا کا تیسرا بڑا ملک ہے۔ ٹربائن جنریٹر پانی کی طاقت سے بجلی پیدا کرتا ہے۔
