امریکی ریاست مونٹانا کے کالی اسپیل سٹی ایئرپورٹ پر لینڈنگ کے دوران ایک چھوٹے طیارے کا حادثہ پیش آیا، جب وہ ایئرپورٹ پر کھڑے دیگر ہوائی جہازوں سے ٹکرا گیا، جس کے باعث آگ لگ گئی۔ خوش قسمتی سے اس واقعے میں کوئی جانی نقصان نہیں ہوا۔
غیر ملکی ذرائع کے مطابق، یہ حادثہ پیر کی دوپہر تقریباً دو بجے پیش آیا۔ حادثہ پیش آنے والا طیارہ ایک سنگل انجن والا سکاتا ٹی بی ایم 700 ٹربو پراپ تھا، جس میں چار افراد سوار تھے۔ لینڈنگ کے دوران طیارہ کنٹرول کھو بیٹھا اور رن وے پر کھڑے کئی طیاروں سے ٹکرا گیا۔
اس ٹکراؤ کے نتیجے میں کئی طیاروں میں آگ بھڑک اٹھی جو قریبی گھاس کے علاقے تک پھیل گئی، تاہم فائر بریگیڈ نے فوری کارروائی کرتے ہوئے شعلوں کو بجھانے میں کامیابی حاصل کی۔
کالی اسپیل ایئرپورٹ کے فائر چیف جے ہیگن نے بتایا کہ طیارے میں سوار تمام مسافر اپنی مدد آپ کے تحت محفوظ طور پر باہر نکلنے میں کامیاب ہوئے جبکہ دو افراد معمولی زخمی ہوئے جنہیں موقع پر فوری طبی امداد فراہم کی گئی۔
