بھارت کے وارانسی ایئرپورٹ پر ایک غیر متوقع واقعہ پیش آیا جب اکاسا ایئر لائنز کی پرواز میں ایک مسافر نے ٹیک آف کے دوران ایمرجنسی ایگزٹ ہینڈل کا حفاظتی کور کھول دیا۔
تفصیلات کے مطابق، بنگلورو جانے والی پرواز نمبر QP-1491 شام 7:55 بجے روانہ ہونے والی تھی کہ پہلی بار ہوائی سفر کرنے والے مسافر اجے تیواری نے ایمرجنسی ایگزٹ کے کور سے چھیڑ چھاڑ شروع کی اور اچانک اسے کھول دیا۔
اس واقعے پر عملے نے فوری طور پر پائلٹ کو اطلاع دی، جس نے ایئر ٹریفک کنٹرول سے رابطہ کر کے طیارے کو واپس بلایا۔ طیارہ رن وے سے واپس ایپرن پر لایا گیا اور تمام مسافروں کو حفاظتی انتظامات کے تحت جہاز سے اتار دیا گیا۔
ایئرپورٹ سیکیورٹی اور پولیس موقع پر پہنچ کر واقعے کی تحقیقات میں مصروف ہو گئی۔ اکاسا ایئر لائنز کے دہلی دفتر کی شکایت پر پولیس نے مسافر کو گرفتار کر لیا۔
تفتیش کے دوران اجے تیواری نے اعتراف کیا کہ انہوں نے یہ حرکت غلطی سے کی کیونکہ وہ صرف یہ جاننا چاہتے تھے کہ ایمرجنسی ایگزٹ کس طرح کام کرتا ہے۔
عینی شاہدین نے بتایا کہ مسافر کی پرواز کے آغاز سے ہی مشکوک حرکات نظر آ رہی تھیں، وہ بار بار ایمرجنسی گیٹ کو چھو رہے تھے، جس سے دیگر مسافروں اور عملے میں تشویش پائی گئی۔
سیکیورٹی ماہرین کا کہنا ہے کہ ایمرجنسی ایگزٹ ہینڈل پر حفاظتی کور اس لیے نصب کیا جاتا ہے تاکہ غلطی سے دروازہ نہ کھل سکے، اور اسے ہٹانے کے لیے خاصی محنت درکار ہوتی ہے۔
