پاکستانی سپر اسٹار فواد خان اور مشہور بالی ووڈ اداکارہ وانی کپور کی مشترکہ فلم ’عبیر گلال‘ کی ریلیز سے متعلق ایک اہم پیشرفت سامنے آئی ہے۔
بھارت میں فواد خان کے مداح اس بات پر خوش تھے کہ یہ فلم 9 مئی 2025 کو ریلیز ہو گی، لیکن پہلگام واقعے کے بعد اس کی ریلیز کو روک دیا گیا۔ بھارتی حکومت نے اس واقعے میں پاکستان کے ملوث ہونے کا الزام عائد کیا، جس کے باعث وہاں پاکستانی فنکاروں کے خلاف نفرت میں اضافہ ہوا۔
کئی شائقین کو خدشہ تھا کہ وہ یہ فلم کبھی نہیں دیکھ پائیں گے، تاہم تازہ اطلاعات کے مطابق ’عبیر گلال‘ اب 29 اگست کو دنیا بھر کے سینما گھروں میں پیش کی جائے گی۔ اس کے ساتھ ہی فلم کا نام بھی ’Abir Gulaal‘ سے بدل کر ’Aabeer Gulaal‘ کر دیا گیا ہے۔
رپورٹس میں واضح نہیں کیا گیا کہ کیا یہ فلم بھارت میں بھی ریلیز کی جائے گی یا نہیں، تاہم بالی وڈ کے ذرائع کے مطابق بھارت میں اس کے ریلیز ہونے کے امکانات نہ کے برابر ہیں۔
ذرائع کا کہنا ہے کہ ’عبیر گلال‘ کے پروڈیوسرز فلم ’سردار جی 3‘ کی ریلیز کی حکمت عملی کو اپنانے کی کوشش کر رہے ہیں۔ یہ فلم بھارتی گلوکار دلجیت دوسانجھ اور پاکستانی اداکارہ ہانیہ عامر کی شمولیت سے بنی ہے۔
’سردار جی 3‘ کو پہلگام واقعے کی وجہ سے بھارت میں نمائش کا موقع نہیں ملا، مگر اسے دیگر ممالک میں ریلیز کیا گیا جہاں اسے کامیابی ملی۔ اسی طرح پنجابی فلم ’چل میرا پٹ 4‘ بھی بھارت کے علاوہ دوسرے ملکوں میں ریلیز ہوئی اور کامیاب رہی۔
اب سوال یہ ہے کہ آیا ’عبیر گلال‘ بھی ان دونوں فلموں کی کامیابی کی راہ پر گامزن ہو پائے گی یا نہیں۔
پہلگام واقعے سے پہلے ’عبیر گلال‘ کی پروموشن زور و شور سے جاری تھی، اور 19 اپریل 2025 کو دبئی کے گلوبل ولیج میں منعقد ہونے والے میوزک لانچ کو شائقین اور میڈیا کی طرف سے خوب پذیرائی ملی تھی۔
