کراچی کے علاقے فیڈرل بی ایریا، راشد منہاس روڈ پر ایک تیز رفتار ڈمپر کی ٹکر سے 22 سالہ ماہ نور اور 14 سالہ علی رضا جاں بحق جبکہ ان کے والد زخمی ہو گئے۔ حادثے کے بعد لاشوں اور زخمی شخص کو فوری طور پر اسپتال منتقل کر دیا گیا۔
حادثے کے بعد شہریوں میں شدید غم و غصہ پھیل گیا، مشتعل ہجوم نے ڈمپر ڈرائیور کو تشدد کا نشانہ بنانے کے بعد 7 ڈمپروں کو نذرِ آتش کر دیا۔ ترجمان ریسکیو کے مطابق فائر بریگیڈ کی ٹیموں نے موقع پر پہنچ کر آگ پر قابو پا لیا۔
پولیس نے ڈمپر جلانے کے الزام میں 10 افراد کو گرفتار کر لیا اور راشد منہاس روڈ کو ہر قسم کی ٹریفک کے لیے بند کر دیا۔
ادھر ڈمپر ڈرائیور ایسوسی ایشن نے سات ڈمپروں کو جلانے کے واقعے پر شدید احتجاج کرتے ہوئے سپر ہائی وے سہراب گوٹھ پر سڑک بلاک کر دی، جس کے باعث بدترین ٹریفک جام اور گاڑیوں کی لمبی قطاریں لگ گئیں۔ ایسوسی ایشن نے نیشنل ہائی وے بند کرنے کا اعلان بھی کیا۔
ایسوسی ایشن کے صدر حاجی لیاقت محسود کا کہنا تھا کہ ڈمپروں کو جلانے کی پوری ذمہ داری سندھ حکومت پر عائد ہوتی ہے۔
