محکمہ موسمیات نے ملک کے چند علاقوں میں گرج چمک کے ساتھ بارش کی پیشگوئی کی ہے، جبکہ ملک کے بیشتر میدانوں میں موسم گرم اور شدید حبس برقرار رہنے کا امکان ہے۔ محکمہ موسمیات کے ڈائریکٹر نے بتایا کہ لاہور میں آنے والے چند روز تک گرمی کی شدت برقرار رہے گی اور حبس کی شدت بھی جاری رہے گی، لیکن لاہور میں تیز بارش کا امکان نہیں ہے۔
ڈائریکٹر عبدالعزیز نے مزید کہا کہ 13 اگست سے ملک کے شمالی اور بالائی علاقوں میں بارشوں کا سلسلہ شروع ہو سکتا ہے۔ لاہور میں ہلکی بارش ہو سکتی ہے مگر تیز بارش کی توقع نہیں ہے۔ مشرقی پنجاب، خطہ پوٹھوہار، بالائی خیبر پختونخوا، کشمیر اور قریبی پہاڑی علاقوں میں کہیں کہیں تیز ہواؤں اور گرج چمک کے ساتھ بارش کا امکان ہے۔
اسلام آباد اور اس کے گرد و نواح میں موسم گرم اور مرطوب رہے گا، جب کہ راولپنڈی، مری، گلیات، جہلم، اٹک، چکوال، سیالکوٹ، خوشاب، گجرات، گوجرانوالہ، نارووال اور قریبی علاقوں میں بھی بعض مقامات پر بارش کی توقع ہے۔ اسی طرح سوات، دیر، بونیر، شانگلہ، کوہستان، بٹگرام، مانسہرہ، پشاور، ایبٹ آباد، مردان، مالاکنڈ، خیبر، باجوڑ، اورکزئی اور کوہاٹ میں بارش ہو سکتی ہے۔
بلوچستان کے بیشتر اضلاع میں بھی موسم گرم اور مرطوب رہنے کا امکان ہے، جبکہ سندھ کے ساحلی علاقوں بشمول کراچی میں بھی چند جگہوں پر بارش کی پیشگوئی ہے۔ آزاد کشمیر اور گلگت بلتستان میں بھی تیز ہواؤں اور گرج چمک کے ساتھ کچھ جگہوں پر بارش ہو سکتی ہے۔
دوسری جانب نوشہرہ اور اس کے اطراف کے علاقوں میں بارشوں کا سلسلہ جاری ہے، جس سے ندی نالے بپھر گئے ہیں اور پانی گھروں اور دکانوں میں داخل ہو گیا ہے۔ نوشہرہ میں رات سے بارش کا تسلسل جاری ہے اور بجلی کی فراہمی بھی متاثر ہوئی ہے۔
نوشہرہ میں بارش کی وجہ سے مختلف علاقوں میں سیلابی صورتحال پیدا ہو گئی ہے، ریلوے کالونی میں پانی گھروں میں داخل ہو گیا اور ڈسپنسری بھی محفوظ نہ رہ سکی۔
گزشتہ 24 گھنٹوں کے دوران ملک کے بیشتر حصوں میں موسم گرم اور حبس زدہ رہا، تاہم اسلام آباد، شمال مشرقی پنجاب، خطہ پوٹھوہار، کشمیر اور بالائی خیبر پختونخوا میں کہیں کہیں تیز ہوائیں اور گرج چمک کے ساتھ بارش ہوئی ہے۔
