لاڑکانہ (بیورو رپورٹ) لاڑکانہ میں تنظیم اصلاح الفقرائے حسینیہ نقشبندیہ ضلع کی جانب سے 14 اگست جشنِ آزادی کے سلسلے میں “پاکستان زندہ باد” کے عنوان سے شاندار ریلی نکالی گئی، جو شہر کے پرانے بس اسٹینڈ سے شروع ہو کر مختلف سڑکوں اور راستوں سے ہوتی ہوئی پریس کلب کے سامنے پہنچی۔ شرکاء نے ہاتھوں میں بینرز اور قومی پرچم اٹھا رکھے تھے اور “پاکستان زندہ باد” اور “پاک فوج زندہ باد” کے نعرے بلند کر رہے تھے۔ریلی سے خطاب کرتے ہوئے حسینی جماعت کے رہنماؤں مولوی محمد علی حسینی، مولوی صدام حسین ٹگڑ، محمد بخش جتوئی، حافظ عنایت اللہ ودھو، سراج احمد عباسی، صدا حسین شاہ جیلانی، سجاد ٹگڑ، گل شیر جتوئی، مولوی شفقت علی، محمد ابراہیم، مولانا شوکت علی میر جت، عبدالجبار برڑو، ظفر علی مگریو، فقیر اظہار حسین میرانی، مولانا مشتاق احمد کھڑو سمیت دیگر نے کہا کہ پیارے وطن پاکستان سے محبت کا اظہار ہر شہری پر فرض ہے، کیونکہ یہ وطن ہمیں دونوں جہانوں کے سردار حضرت محمد مصطفی ﷺ کے صدقے میں بطور تحفہ ملا، جسے ہمارے بزرگوں،
قائداعظم محمد علی جناح اور دیگر رہنماؤں نے طویل جدوجہد کے بعد انگریز سامراج سے آزاد کرایا۔ انہوں نے کہا کہ پاکستان کی آزادی میں 90 ہزار اہل سنت مشائخ، علما اور دیگر مسلمانوں کی قربانیاں شامل ہیں، جن کے نتیجے میں ہمیں یہ آزاد وطن نصیب ہوا۔ رہنماؤں نے مزید کہا کہ آج بھی دنیا کے کئی ممالک آزادی کی جنگ لڑ رہے ہیں، لیکن اللہ تعالیٰ کے فضل و کرم سے 14 اگست 1947 کو ہمارا پیارا وطن پاکستان آزاد ہوا اور ہم ایک آزاد ملک کے شہری ہیں، جس پر ہمیں فخر ہے۔انہوں نے کہا کہ دنیا کے کئی ممالک، بشمول بھارت، میں مسلمانوں کی بڑی تعداد موجود ہے لیکن وہاں وہ اپنی مذہبی رسومات آزادانہ طور پر ادا نہیں کر سکتے، جبکہ پاکستان وہ خوش نصیب ملک ہے جہاں ہر مذہب کے لوگ اپنی عبادات اور رسومات آزادی کے ساتھ انجام دے سکتے ہیں اور اپنی زندگی آزادی سے گزار سکتے ہیں۔رہنماؤں نے مزید کہا کہ ملک میں دہشت گردی کے خاتمے اور سرحدوں کی حفاظت میں پاک فوج کا کردار قابلِ تحسین ہے، جنہوں نے اپنی جانوں کا نذرانہ پیش کرتے ہوئے دہشت گردوں کے خلاف سخت کارروائیاں کیں اور ملک کا دفاع کیا۔ ہم پاک فوج کو خراجِ عقیدت پیش کرتے ہیں۔ریلی کے اختتام پر ملک کی ترقی، سلامتی اور خوشحالی کے لیے خصوصی دعائیں کی گئیں۔
