آل پاکستان پرائیویٹ سکولز ایسوسی ایشن نے گرمیوں کی تعطیلات میں اضافے کو غیر ضروری قرار دیتے ہوئے اس فیصلے کو واپس لینے کا مطالبہ کیا ہے۔
وزیر تعلیم پنجاب کی جانب سے موسم گرما کی تعطیلات کو بڑھا کر سکولوں کو یکم ستمبر سے دوبارہ کھولنے کا اعلان کیا گیا تھا، جبکہ پہلے تعطیلات 14 اگست تک تھیں۔ رانا سکندر حیات نے سوشل میڈیا پر صوبے بھر کے سرکاری و نجی سکولوں کی یکم ستمبر سے دوبارہ آغاز کی اطلاع دی۔ اس توسیع کا فیصلہ موسم کی صورتحال کے پیش نظر کیا گیا۔
تاہم آل پاکستان پرائیویٹ سکولز مینجمنٹ ایسوسی ایشن نے اس توسیع کو غیر معقول قرار دیا ہے اور کہا ہے کہ اسلام آباد میں نجی تعلیمی ادارے پہلے ہی 4 اگست سے کام شروع کر چکے ہیں، جبکہ ملک کے دیگر صوبوں میں بھی اسکول دوبارہ کھل چکے ہیں۔ ایسوسی ایشن نے کہا کہ بچوں کو تین مہینے تعلیم سے دور رکھنا نقصان دہ ہے اور اس سے میٹرک کی کلاسز شدید متاثر ہوں گی۔ اسی وجہ سے انہوں نے صوبائی وزیر تعلیم رانا سکندر حیات سے اس فیصلے پر نظرثانی کا مطالبہ کیا ہے۔
دوسری جانب سندھ اور بلوچستان میں گرمیوں کی تعطیلات ختم ہو چکی ہیں اور تعلیمی ادارے یکم اگست سے دوبارہ کھل گئے ہیں۔ سندھ محکمہ تعلیم نے 1 جون سے 31 جولائی تک تعطیلات کا اعلان کیا تھا اور کراچی میں زیادہ تر نجی سکولز 4 اگست سے تعلیمی سرگرمیاں شروع کر چکے ہیں۔
