مشہور بھارتی کامیڈین اور اداکار کپل شرما کے کیفے پر کینیڈا میں ایک ماہ کے اندر دوسرا بڑا حملہ ہو گیا ہے، جس کی ذمہ داری بشنوئی گینگ نے قبول کرتے ہوئے مستقبل میں مزید کارروائی کی دھمکی دی ہے۔
یہ واقعہ صبح تقریباً 4:40 بجے پیش آیا، جب نامعلوم حملہ آوروں نے چلتی گاڑی سے کپل شرما کے کیپس کیفے پر 25 فائرنگ کے شیل فائر کیے۔ خوش قسمتی سے اس حملے میں کوئی جانی نقصان نہیں ہوا، مگر کیفے کی کھڑکیاں اور عمارت کو بھاری نقصان پہنچا ہے۔
کپل شرما اور ان کی اہلیہ کا یہ کیفے سرے، برٹش کولمبیا میں واقع ہے، جس کا افتتاح چند ہفتے پہلے ہوا تھا۔ اس سے پہلے بھی 10 جولائی کو کیفے پر ایک حملہ ہو چکا ہے، جس کے بعد علاقے میں خوف و ہراس پھیل گیا تھا۔
بھارتی میڈیا کی رپورٹ کے مطابق دو خطرناک گینگسٹر گروپ، گُرپریت سنگھ المعروف گولڈی ڈھلون اور لارنس بشنوئی گینگ نے اس حملے کی ذمے داری قبول کی ہے۔
سوشل میڈیا پر گولڈی ڈھلون نے جاری کردہ بیان میں کہا کہ کپل شرما کے کیفے پر فائرنگ کا ذمہ دار وہی دونوں گینگ ہیں۔ انہوں نے مزید کہا کہ فون کرنے کی کوشش کی گئی مگر جواب نہ ملا، اس لیے کارروائی کرنا پڑی، اور اگر رابطہ نہ ہوا تو اگلی کارروائی جلد ہی ممبئی میں کی جائے گی۔
اس واقعے کی مبینہ ویڈیو بھی سوشل میڈیا پر گردش کر رہی ہے، جس میں گولیوں کی آوازیں سنائی دیتی ہیں۔
