محکمہ موسمیات نے ملک میں ایک اور مون سون سپیل کی پیشگوئی کر دی ہے، جس کے تحت پنجاب، خیبرپختونخوا اور کشمیر کے کئی علاقوں میں تیز ہواؤں، گرج چمک اور بارش کا امکان ظاہر کیا گیا ہے۔ بلوچستان میں بھی بارش ہونے کی توقع ہے، جب کہ کراچی سمیت سندھ کے ساحلی حصوں میں مطلع جزوی طور پر ابر آلود رہے گا، اور کہیں کہیں ہلکی بارش یا بونداباندی بھی ہو سکتی ہے۔
ادھر نیشنل ڈیزاسٹر مینجمنٹ اتھارٹی (این ڈی ایم اے) نے شدید بارشوں کے باعث کشمیر اور گلگت بلتستان کے مختلف اضلاع میں ممکنہ سیلاب کے خطرے سے خبردار کیا ہے۔ الرٹ کے مطابق ہنزہ، گھانچے اور شگر جیسے علاقوں میں اچانک طغیانی اور ندی نالوں میں پانی کی سطح بڑھنے کا خدشہ ہے۔
کشمیر میں وادی نیلم، مظفرآباد، راولاکوٹ، پونچھ، ہٹیاں، باغ، حویلی، سدھنوتی، کوٹلی، بھمبر اور میرپور میں بھی سیلابی صورتحال پیدا ہونے کا امکان ہے۔
این ڈی ایم اے نے متعلقہ اداروں کو ہدایت دی ہے کہ وہ پیشگی اقدامات کو یقینی بنائیں اور خطرے والے علاقوں میں رہنے والے شہریوں کو بروقت خبردار کریں۔ حساس علاقوں میں غیر ضروری سفر سے گریز کی اپیل بھی کی گئی ہے۔
گزشتہ 24 گھنٹوں کے دوران مظفرآباد اور آس پاس کے علاقوں میں بارش ہوئی، جس کے نتیجے میں کئی علاقوں میں بجلی کی فراہمی متاثر ہوئی۔ دریائے چناب اور جہلم میں اونچے درجے کے سیلاب کا خطرہ بڑھ گیا ہے، جب کہ سوات اور پنجکوڑہ کے ندی نالوں میں بھی طغیانی کا خدشہ ہے۔
تربیلا، کالا باغ، چشمہ، تونسہ اور گڈو بیراج میں درمیانے درجے کے سیلاب کی پیشگوئی کی گئی ہے۔ تربیلا ڈیم میں پانی کی سطح بڑھنے پر اسپل ویز کھول دیے گئے ہیں، جبکہ خانپور ڈیم کی سطح بھی بلند ہو رہی ہے، جو اب ہائی لیول سے صرف 11 فٹ کم رہ گئی ہے۔
دوسری جانب خراب موسم کے باعث اسلام آباد اور لاہور ایئرپورٹس پر فلائٹ آپریشن بھی متاثر ہوا ہے۔ اسلام آباد ایئرپورٹ پر 21 پروازیں تاخیر کا شکار ہوئیں، جب کہ کراچی سے اسلام آباد آنے والی ایک پرواز کو فیصل آباد میں اتارا گیا۔
ریاض، ابوظہبی، مسقط، باکو اور دوحہ سے آنے والی پروازوں کو لینڈنگ میں دشواری کا سامنا رہا، جس کی وجہ سے ان کی روانگی میں بھی تاخیر ہوئی۔ بعض پروازیں ایک سے دو گھنٹے تاخیر کا شکار ہوئیں۔
کراچی سے لاہور کی ایک پرواز ساڑھے چار گھنٹے کی تاخیر سے روانہ ہوئی، جب کہ کراچی سے اسلام آباد جانے والی نجی ایئرلائن کی پرواز میں بھی دو گھنٹے تاخیر ہوئی۔
کوالالمپور سے لاہور کی دو بین الاقوامی پروازیں مکمل طور پر منسوخ کر دی گئیں، جبکہ لاہور ایئرپورٹ پر مجموعی طور پر سات پروازوں کی آمد و روانگی میں ایک سے ساڑھے نو گھنٹے کی تاخیر رپورٹ ہوئی ہے۔
