اسپین میں چھٹیاں گزارنے کے بعد واپسی کی تیاریوں میں مصروف ایک برطانوی خاندان کو اس وقت حیران کن صورتحال کا سامنا کرنا پڑا جب ان کا 15 سالہ بیٹا غلطی سے انگلینڈ کی بجائے اٹلی جا پہنچا، وہ بھی بغیر ٹکٹ کے۔
برطانوی اخبار دی گارجین کے مطابق یہ واقعہ ایک مصروف ہسپانوی ایئرپورٹ پر پیش آیا، جہاں پرواز سے پہلے نوجوان لڑکا اپنے والدین سے بچھڑ گیا اور غلطی سے میلان (اٹلی) جانے والی پرواز میں سوار ہو گیا۔
والدین نے بیٹے کی گمشدگی پر فوری طور پر ایئرپورٹ حکام کو مطلع کیا اور خطرے کا الارم بجایا، مگر تب تک پرواز اڑان بھر چکی تھی۔ ایئرپورٹ سیکیورٹی کی جانب سے سی سی ٹی وی فوٹیج کے تجزیے سے معلوم ہوا کہ لڑکا بغیر ٹکٹ میلان جانے والی پرواز میں چلا گیا تھا۔
اٹلی کی پرواز کے دوران ایئرلائن کے عملے کو جب مشتبہ صورتحال کا اندازہ ہوا، تو لڑکے سے پوچھ گچھ کی گئی، جس پر اصل معاملہ سامنے آ گیا۔ بعد ازاں میلان ایئرپورٹ پر حکام نے لڑکے کو سنبھالا اور اس کی ملاقات خاندان کے ایک فرد سے کرائی، جو ممکنہ طور پر اس کی والدہ تھیں اور اسی روز اٹلی کے لیے روانہ ہو چکی تھیں۔
ایئرلائن ایزی جیٹ کے ترجمان کے مطابق، وہ اس واقعے کی مکمل تحقیقات کر رہے ہیں کہ ایک نابالغ لڑکا کیسے سیکیورٹی اور ٹکٹ چیکنگ سے بچتے ہوئے پرواز میں سوار ہوا۔ ترجمان کا کہنا تھا کہ کمپنی خاندان سے مسلسل رابطے میں ہے اور ہر ممکن مدد فراہم کی جا رہی ہے۔
