رانا رضوان خاں۔ بیورو چیف جرمنی
===========================
بانی پی ٹی آئی کی رہائی کے سلسلہ میں جرمنی کے شہر فرینکفرٹ میں پی ٹی آئی جرمنی کی جانب سے ایک شانداراحتجاجی مظاہرہ کیا گیا۔ احتجاجی مظاہرے کی قیادت صدر پی ٹی آئی جرمنی قاضی حبیب الرحمن ، فاروق بٹ ، توقیر بُٹر , سجاد کاہلوں اور ظہیر احمد بسرا نے کی جبکہ اس موقع پر عورتوں اور بچوں سمیت یورپ بھر سے کارکنان کی ایک بڑی تعداد نے شرکت کی۔
کارکنان نے ہاتھوں میں بینرز اور پلے کارڈز اُٹھا رکھے تھے جن پہ عمران خان کی رہائی کے معتلق مختلف نعرے درج تھے۔ اس کے ساتھ ساتھ عمران کی تصاویر ، پاکستانی پرچم اور پی ٹی آئی کے جھنڈے بھی مظاہرین کے ہاتھوں میں نظر آئے۔
مظاہرے کا آغاز تلاوت قرآن پاک سے ہوا جس کے بعد مقامی قیادت نے عمران خان کے حق میں تقاریر کیں جبکہ پاکستان سے قاسم خان سوری نے مظاہرے سے ٹیلیفونک خطاب کیا۔
اس موقع پر کارکنان نے بانی پی ٹی آئی کے حق میں شدید نعرے بازی کی۔ فرینکفرٹ کی فضا قیدی نمبر 804 اور عمران خان کو رہا کرو کے نعروں سے گونجتی رہی۔ بعد ازاں مظاہرین نے ریلی کی شکل میں مارچ کیا جس کی قیادت عورتوں اور بچوں نے کی اور نوجوان پارٹی ترانوں پر بھنگڑے ڈالتے رہے اور عمران خان زندہ باد کے نعرے لگاتے رہے۔ مظاہرے کے اختتام پر عمران خان کے لیے خصوصی دعا کی گئی اور حاضرین کا شکریہ ادا کیا گیا۔
