روس کے کامچٹکا علاقے میں 29 جولائی کو آنے والے شدید زلزلے (شدت 8.8) نے جاپان، امریکہ، چین اور روس کے ساحلی علاقوں میں سونامی کی وارننگ جاری کروا دی۔
اس خوفناک زلزلے کے دوران لاکھوں لوگ اپنے موبائل فونز پر سونامی کی صورتحال کو ٹریک کرتے نظر آئے، جب کہ چین میں ایک لاکھ سے زائد افراد نے ایک خاص پیشگوئی سے متعلق آن لائن تلاش شروع کر دی۔
یہ پیشگوئی 2021 میں ایک جاپانی آرٹسٹ کی مانگا (کامک بک) میں کی گئی تھی، جس میں جولائی 2025 میں ایک بہت بڑے زلزلے کا ذکر تھا۔ اگرچہ حقیقی زلزلہ 5 جولائی کی بجائے 29 جولائی کو آیا، لیکن لوگوں نے اسے حیران کن اتفاق سمجھ کر اس پیشگوئی پر یقین کر لیا۔
تاہم جاپانی ماہرینِ ارضیات نے ان دعوؤں کو غیر سائنسی اور گمراہ کن قرار دیتے ہوئے کہا ہے کہ زلزلے کی صحیح پیشگوئی کرنا ابھی بھی ممکن نہیں ہے۔ ان کا کہنا ہے کہ ایسے دعوے عوام میں غیر ضروری خوف پھیلانے کا باعث بنتے ہیں۔
