محکمہ موسمیات اور پنجاب ڈیزاسٹر مینجمنٹ اتھارٹی (PDMA) نے صوبے میں آئندہ دنوں کے دوران مزید شدید بارشوں کے پیش نظر خبردار کر دیا ہے۔ جاری کردہ الرٹ کے مطابق 7 اگست تک موسلادھار بارشوں کا امکان ہے، جس سے سیلاب اور لینڈ سلائیڈنگ کا خطرہ بڑھ گیا ہے۔
محکمہ موسمیات کے مطابق اس وقت لاہور اور گرد و نواح میں مون سون کا ایک کمزور سسٹم موجود ہے، جس کے باعث بارش کی شدت میں کمی دیکھی گئی ہے، اور موسم بتدریج گرم ہو رہا ہے۔
آج لاہور کا درجہ حرارت کم سے کم 27 اور زیادہ سے زیادہ 35 ڈگری سینٹی گریڈ تک رہنے کا امکان ہے۔
پی ڈی ایم اے کے ترجمان کا کہنا ہے کہ پنجاب کے مختلف اضلاع میں شدید بارشوں کی پیشگوئی کی گئی ہے، خصوصاً دریاؤں کے بالائی علاقوں میں گرج چمک کے ساتھ تیز بارش متوقع ہے۔
5 اگست کے بعد ہونے والی بارشوں سے دریائے چناب اور جہلم میں درمیانے سے بلند درجے کے سیلاب کا خدشہ ہے۔
پی ڈی ایم اے نے نہ صرف اپنا صوبائی کنٹرول روم بلکہ تمام ضلعی ایمرجنسی آپریشن سینٹرز کو بھی ہائی الرٹ کر دیا ہے۔
زیادہ متاثر ہونے والے ممکنہ اضلاع میں شامل ہیں:
راولپنڈی، فیصل آباد، گجرانوالہ، سرگودھا، ملتان، ساہیوال، بہاولپور، جہلم، اٹک، چکوال، مری، گلیات، میانوالی، نارووال، گجرات، سیالکوٹ، ٹوبہ ٹیک سنگھ، منڈی بہاؤالدین اور ڈی جی خان۔
پی ڈی ایم اے نے خبردار کیا ہے کہ نشیبی علاقوں میں ندی نالوں میں طغیانی آ سکتی ہے، جبکہ مری اور دیگر پہاڑی علاقوں میں لینڈ سلائیڈنگ کا بھی امکان موجود ہے۔
ڈی جی پی ڈی ایم اے عرفان علی کاٹھیا نے تمام ضلعی انتظامیہ کو ہدایت کی ہے کہ وہ فیلڈ میں موجود رہ کر صورتحال کی نگرانی کریں۔
واسا اور میونسپل اداروں کو تاکید کی گئی ہے کہ نشیبی علاقوں سے پانی کے فوری نکاس کو یقینی بنائیں۔ شہریوں، سیاحوں اور مسافروں کو مشورہ دیا گیا ہے کہ غیر ضروری سفر سے پرہیز کریں اور احتیاطی تدابیر اختیار کریں۔
