نامور پاکستانی گلوکار علی سیٹھی ایک بار پھر اپنے منفرد اندازِ لباس اور غیر روایتی فیشن کے باعث خبروں کا موضوع بن گئے ہیں۔
عالمی شہرت یافتہ گیت پسوڑی کے گلوکار علی سیٹھی نے حال ہی میں اپنے انسٹاگرام اکاؤنٹ پر نئے گانے برائیڈ گروم کی ریلیز کے موقع پر تصاویر اور ویڈیوز شیئر کیں، جس کے بعد وہ سوشل میڈیا پر شدید زیرِ بحث آ گئے۔
انسٹاگرام پر شیئر کی گئی تصاویر میں علی سیٹھی کو پیلے رنگ کی اسکرٹ اور میک اپ کے ساتھ دیکھا جا سکتا ہے۔ اُن کے نئے گانے میں ایک دلہن کے جذبات اور اس کی سہیلیوں سے ہونے والی بات چیت کو تخلیقی انداز میں پیش کیا گیا ہے۔
تاہم، ان کے لباس اور انداز کو عورتوں کے لباس سے متاثرہ قرار دیتے ہوئے صارفین کی جانب سے سخت ردِعمل دیکھنے میں آیا۔ کئی سوشل میڈیا صارفین نے ان کے فیشن کو “عجیب” کہا اور ان کی جنس اور جنسی رجحان پر بھی سوالات اٹھائے۔
کچھ افراد کا کہنا تھا کہ علی سیٹھی خود کو کھلے عام “کوئیر” ظاہر کرتے ہیں اور ہم جنس پرستی کے ساتھ ساتھ ممکنہ تعلقات میں بھی ہیں۔ ایک صارف نے تنقید کرتے ہوئے لکھا کہ “یہ سب حرام کمائی کا نتیجہ ہے جس پر وہ بڑے ہوئے ہیں”، جبکہ ایک اور نے کہا کہ “وہ ایک خفیہ ایجنڈا پر کام کر رہے ہیں۔”
علی سیٹھی کی جانب سے تاحال ان تنقیدوں پر کوئی ردعمل سامنے نہیں آیا، لیکن ان کے فیشن اور خود اظہار کے انداز نے ایک بار پھر سوشل میڈیا پر گرما گرم بحث چھیڑ دی ہے۔
