فیفا مینز ورلڈ کپ 2026 میں وینکوور کا اہم کردار
وینکوور فیفا ویمنز ورلڈ کپ 2015 کی شان دار میزبانی کی
مسرور احمد مسرور
فٹ بال کا کھیل دنیا کے مقبول ترین کھیلوں میں سر فہرست ہے یہی وجہ ہے کہ فٹ بال کے عالمی ورلڈ کپ کے مقابلوں کو دوسرے انٹرنیشنل ایونٹس کے مقابلے میں بہت زیادہ اہمیت حاصل ہے۔ 2022 میں فیفا ورلڈ کپ مقابلے قطر میں منعقد ہوئے جس کے بعد 2026 کے فیفا مینز ورلڈ کپ ٹورنامنٹ کی تیاریاں زور و شور سے جاری ہیں۔ فٹ بال کے ورلڈ کپ کے مقابلوں میں وینکوور کا کردار بھی اپنی جگہ اہمیت کا حامل ہے کیوں کہ 2015 میں وینکوور نے فیفا ویمنز ورلڈ کپ کی شان دار انداز میں میزبانی کرتے ہوئے ثابت کر دیا تھا کہ وینکوور عالمی کھیلوں کے مقابلے منعقد کروانے کے سلسلے میں بہترین انتظامی صلاحیتوں کا حامل شہر ہے یہی وجہ ہے کہ آنے والے فیفا ورلڈ کپ 2026 ٹورنامنٹ کے لیے وینکوور کو بھی میچز کی میزبانی کا موقعہ میسر آیا ہے۔
فیفا ویمنز ورلڈ کپ کا انعقاد 2015 میں کینیڈا کے شہر وینکوور میں ہوا تھا۔ یہ مقابلے 6 جون سے5 جولائی 2015 تک بی سی پلیس اسٹیڈیم وینکوور میں منعقد ہوئے تھے۔ وینکوور نے 9 میچز کی میزبانی کی تھی جن میں فائنل میچ بھی شامل تھا۔ 5 جولائی کو اس ورلڈ کپ کے فائنل میں امریکا نے جاپان کو 2-5 سے ہرا کر ورلڈ چیمپئن بننے کا اعزاز حاصل کر لیا تھا۔ یہ فائنل میچ امریکا میں دیکھے جانے والے سب سے زیادہ میچوں میں شامل کیا گیا۔ وینکوور میں منعقدہ فیفا ویمنز ورلڈ کپ مقابلوں کی وجہ سے اس شہر کی کی سیاحت اور عالمی شہرت میں اضافہ ہوا۔
2026 میں فیفا مینز ورلڈ کپ اگلے سال جون جولائی میں منعقد ہونے جا رہا ہے جس کی تیاریاں زور و شور سے جاری ہیں۔ یہ پہلا موقعہ ہے کہ اس ورلڈ کپ کی پہلی بار تین ممالک میزبانی کر رہے ہیں جن میں کینیڈا، میکسیکو اور امریکا شامل ہیں۔ یہ بھی پہلی بار ہو رہا ہے کہ اس ورلڈ کپ میں 48 ٹیمیں حصہ لیں گی۔ کینیڈا میں وینکوور اور ٹورانٹو ورلڈ کپ کے کچھ میچوں کی میزبانی کریں گے۔ تینوں ممالک کے 16 شہروں میں یہ میچز کھیلے جائیں گے۔ میکسیکو کے تین اور امریکا کے 11 شہروں میں میچز کا انعقاد ہوگا۔ وینکوور میں کھیلے جانے والے تمام میچز بی سی پلیس اسٹیڈیم میں ہوں گے جسے فیفا کے عالمی معیار کے مطابق اپ گریڈ کیا جا رہا ہے۔
فیفا ورلڈ کپ 2026 میں پچھلے سال کے مقابلے میں 16 زیادہ ٹیمیں حصہ لیں گی اس طرح اس بار 32کے بجائے 48 ٹیموں کو فٹ بال کے عالمی مقابلوں میں ان ایکشن دیکھا جا سکے گا۔ ورلڈ کپ کا فائنل 19 جولائی 2026 کو نیویارک نیو جرسی میں ہو گا جبکہ اس عالمی ٹورنامنٹ کا افتتاحی میچ 11 جون کو میکسیکو شہر میں ہوگا۔ ارجنٹائن جو اس عالمی ٹورنامنٹ کا تین بار کا دفاعی چیمپئن ہے، ورلڈ کپ جیتنے کے لیے بھرپور انداز کی تیاری میں مصروف ہے۔ ادھر وینکوور میں بی سی پلیس اسٹیڈیم کو عالمی معیار کے مطابق اپ ڈیٹ کرنے کے سلسلے میں زور و شور سے کام جاری ہے۔
قدرتی گھاس کے میدان کے ساتھ ساتھ دیگر ہر طرح کی سہولتوں کی فراہمی، وی آئی پی ایریاز کی تزئین و آرائش کے اہتمام کا خاص خیال رکھا جا رہا ہے تاکہ وینکوور کا نام اور اس کی وہ ساکھ جو 2015 کے ویمنز ورلڈ کپ میں دیکھی گئی تھی وہ قائم رہ سکے۔
وینکوور کے لیے ایک بڑی آزمائش ہے کہ فیفا مینز ورلڈ کپ 2026 میں انھیں میزبانی کی جو ذمے داری سونپی گئی ہے وہ ہر طرح سے کامیابی کے نئے ریکارڈ قائم کرے اور 2026 میں منعقد ہونے والے فٹ بال ورلڈ مقابلوں کے بعد وینکو ور کو میزبانی کے زیادہ مواقع مل سکیں۔
