سرسید یونیورسٹی میں FPCCI کی Edu – Tech Summit 2.0 کا انعقاد
ٹیکنالوجی پر مبنی تعلیم، ڈیجیٹل ترقی کی جانب ایک اہم قدم ہے، کیونکہ پاکستان کی ترقی کا سفر
جدید تعلیم اور ٹیکنالوجی سے جُڑا ہوا ہے۔ چانسلر اکبر علی خان
کراچی، 3 /اگست 2025۔۔ فیڈریشن آف پاکستان چیمبرز آف کامرس اینڈ انڈسٹری (FPCCI) کی کور کمیٹی برائے تعلیمی اصلاحات کے زیرِ اہتمام سرسید یونیورسٹی آف انجینئرنگ اینڈ ٹیکنالوجی کے شعبہ ریسرچ، انوویشن اور کمرشلائزیشن (ORIC) کے تعاون سے Edu – Tech Summit 2.0 کا انعقاد کیا گیا جس کا مقصد تعلیمی شعبہ کو درپیش چیلنجز کی نشاندہی کرنا اور جدید ٹیکنالوجی، مصنوعی ذہانت، اور ڈیجیٹل انفراسٹرکچر کے استعمال کو فروغ دینا تھا تاکہ اسکولوں، کالجوں اور یونیورسٹیوں کے تعلیمی معیار کو بلند کیا جا سکے۔
تقریب کے شرکاء میں سرسید یونیورسٹی کے چانسلر محمد اکبر علی خان، رجسٹرار کموڈور (ر) سید سرفراز علی، پرائم منسٹر یوتھ پروگرام سندھ کے کوآرڈینیٹر فہد شفیق، FPCCI ایجوکیشن ریفارمز کمیٹی کی کنوینر محترمہ صدف بھٹی، شعبہ کمپیوٹر سائنس کے چیئرمین ڈاکٹر کاشف شیخ، ORIC کے منیجر سید محمد ریاض الحق اور دیگر تعلیمی و صنعتی اداروں کے نمائندگان شامل تھے۔
سرسید یونیورسٹی کے چانسلر محمد اکبر علی خان نے اس موقع پر کہا کہ نوجوانوں کو جدید ٹیکنالوجی سے روشناس کرانا مستقبل کی ترقی کے لئے بہت ضروری ہے، اور سرسید یونیورسٹی جدت کے اس سفر میں قائدانہ کردار ادا کرے گی۔
پرائم منسٹر یوتھ پروگرام سندھ کے کوآرڈینیٹر فہد شفیق نے کہا کہ تعلیمی میدان میں ٹیکنالوجی نوجوانوں کو مستقبل کے چیلنجز کے لیے تیار کرتی ہے۔ اور حکومت ایسے اقدامات کی بھرپور حمایت کرتی ہے جو تعلیمی میدان میں انقلابی تبدیلی کا پیش خیمہ ثابت ہوں۔
میٹنگ کے دوران ایف پی سی سی آئی کی ایجوکیشن ریفارم کمیٹی کی کنوینئر صدف بھٹی نے ایجوکیشن ٹیک ریفارم سمیٹ 2025 کے مقاصد کی وضاحت کرتے ہوئے نوجوانوں کو با اختیار بنانے اوراعلیٰ کارکردگی کو یقینی بنانے کے لئے تعلیمی اداروں میں اے آئی۔ ٹیک ایجوکیشن کے فروغ کے لئے تجاویز پیش کیں۔
اجلاس میں مقررین نے نوجوانوں کو بااختیار بنانے، انوویشن کے فروغ اور عملی مہارتوں کی اہمیت پر زور دیتے ہوئے قومی سطح پر ڈیجیٹل تعلیم کے فروغ کو تعلیمی اصلاحات کا سنگِ بنیاد بھی قرار دیا۔
عبدالحامد دکنی
ڈپٹی ڈائریکٹر انفارمیشن
