پاکستان کی تفریحی دنیا میں ایک نیا باب رقم کرتے ہوئے، عالمی شہرت یافتہ میوزک مقابلے ’پاکستان آئیڈل‘ کا باقاعدہ آغاز ملک بھر میں ہونے جا رہا ہے۔
یہ مقابلہ بین الاقوامی کمپنی فریمنٹل کے لائسنس کے تحت تیار کیا جا رہا ہے اور پاکستان میں اسے ایم ایچ ایل گلوبل پیش کرے گی۔
تیاریوں کا سلسلہ شروع ہو چکا ہے، جس کا مقصد ملک کے نوجوان اور ابھرتے ہوئے گلوکاروں کو ایک عالمی معیار کا پلیٹ فارم مہیا کرنا ہے۔
شرکاء کو ٹی وی پر اپنی پرفارمنس دکھانے، جدید تربیت حاصل کرنے اور ناظرین کے ووٹ کے ذریعے اپنی قسمت آزمانے کا موقع دیا جائے گا۔
یہ شو ملک کے مختلف ثقافتی اور علاقائی پس منظر رکھنے والے باصلاحیت فنکاروں کو سامنے لانے کے لیے وقف ہے۔
پاکستان آئیڈل کی جج پینل میں چار نامور فنکار شامل ہیں: راحت فتح علی خان، فواد خان، زیب بنگش، اور بلال مقصود۔
یہ ماہرین نہ صرف شرکاء کی رہنمائی کریں گے بلکہ ہر ہفتے ناظرین کے لیے یادگار لمحات بھی تخلیق کریں گے۔
اس شو کی پروڈکشن بین الاقوامی معیار کی حامل ہوگی، جس میں براہِ راست پرفارمنسز، تھیم پر مبنی چیلنجز، اور ایک جدید ڈیجیٹل حکمت عملی شامل ہے۔
اس حوالے سے، زویا مرچنٹ نے کہا ہے کہ پاکستان آئیڈل کے لیے فریمنٹل کے ساتھ شراکت داری پاکستان کی تخلیقی اور تفریحی صنعت کے لیے ایک اہم سنگِ میل ہے، جو صرف تفریح تک محدود نہیں بلکہ ایک ثقافتی تحریک کا آغاز ہے۔
پاکستان بھر میں بے شمار موسیقی کے ہنر مند موجود ہیں اور یہ پروگرام ان کی صلاحیتوں کو نہ صرف قومی بلکہ عالمی سطح پر روشناس کرائے گا۔
آن لائن آڈیشنز آج سے بگن Begin کے سرکاری پلیٹ فارم پر شروع ہو چکی ہیں، جبکہ بڑے شہروں اور دور دراز علاقوں میں آڈیشنز اسی ماہ کے آخر میں منعقد کی جائیں گی تاکہ ہر علاقے کے نوجوان فنکاروں کو برابر موقع ملے۔
