معروف اداکار عدنان صدیقی نے اپنی رہائش گاہ پر منعقدہ ایک دلکش تقریب میں بانسری پر مشہور نغمے بجا کر شرکاء کو حیرت میں ڈال دیا۔ ان کی اس خوبصورت پرفارمنس پر حاضرین نے خوب داد دی، خاص طور پر سینئر اداکار اعجاز اسلم نے ان کے فن کی کھل کر تعریف کی۔
یہ ویڈیو سوشل میڈیا پر تیزی سے وائرل ہو گئی اور مداحوں نے بھی بے حد پسندیدگی کا اظہار کیا۔
یہ منفرد اور یادگار تقریب لائف اسٹائل جرنلسٹس ایسوسی ایشن کراچی کے تعاون سے منعقد کی گئی، جس کا مقصد فنکاروں اور صحافیوں کے درمیان روابط کو فروغ دینا تھا۔
تقریب میں فلم و ڈرامہ انڈسٹری کے نمایاں چہروں کے ساتھ صحافی برادری کی بھرپور شرکت بھی دیکھنے کو ملی۔
محفل میں چائے کی چسکیوں کے ساتھ دلچسپ گفتگو اور فن پر تبادلۂ خیال ہوا۔ اس موقع پر عدنان صدیقی کی جانب سے بانسری کی دل موہ لینے والی دھنیں محفل کا مرکزِ نگاہ بن گئیں۔
اعجاز اسلم اور عدنان صدیقی کے درمیان ہونے والی خوش مزاج مکالمے بھی حاضرین کے چہروں پر مسکراہٹیں بکھیر گئے۔
عدنان صدیقی نے اپنے خیالات کا اظہار کرتے ہوئے کہا کہ فنکاروں اور صحافیوں کا ایک پلیٹ فارم پر آنا ایک مثبت قدم ہے، اور وہ لائف اسٹائل جرنلسٹس ایسوسی ایشن کے ساتھ مکمل تعاون جاری رکھیں گے۔
انہوں نے مزید کہا:
“ہمارے ہاں سب سے عمدہ کام کرنے والوں کو ہی زیادہ مشکلات کا سامنا ہوتا ہے، مگر میں موسیقی اور اداکاری کو اپنا جنون سمجھتا ہوں۔ میری کوشش ہوتی ہے کہ فن کی ہر صنف میں اپنی صلاحیتوں کو آزما سکوں۔ اردو زبان میرے دل کے بہت قریب ہے۔”
