محکمہ موسمیات نے خبردار کیا ہے کہ 5 سے 7 اگست 2025 کے دوران گلگت بلتستان بشمول ضلع سکردو میں شدید بارشوں کا سلسلہ متوقع ہے۔ موسلا دھار بارشوں کے باعث ندی نالوں میں طغیانی اور پہاڑی علاقوں میں لینڈ سلائیڈنگ کا خدشہ ظاہر کیا گیا ہے، جس سے نہ صرف فصلوں کو نقصان پہنچنے کا امکان ہے بلکہ کمزور مکانات اور بنیادی ڈھانچے کو بھی خطرہ لاحق ہو سکتا ہے۔
محکمہ موسمیات کے مطابق، دیوسائی، جگلوٹ-سکردو روڈ اور دیگر سیاحتی مقامات پر ٹریفک کی روانی متاثر ہو سکتی ہے جبکہ بعض رابطہ سڑکیں بھی عارضی طور پر بند ہونے کا امکان ہے۔ ایسے میں عوام اور سیاحوں کو ہدایت کی گئی ہے کہ وہ غیر ضروری سفر سے اجتناب کریں اور خاص طور پر پہاڑی علاقوں میں احتیاط برتیں۔
انتظامیہ کی جانب سے شہریوں کو تاکید کی گئی ہے کہ کسی بھی ہنگامی صورتِ حال میں فوری طور پر متعلقہ اداروں کو اطلاع دیں تاکہ بروقت اقدامات کیے جا سکیں۔
