موسیقی کے شہنشاہ اور دنیا بھر میں مقبول لیجنڈری گلوکار مائیکل جیکسن کی تاریخی جرابیں تقریباً 8 ہزار 800 ڈالرز میں نیلام ہو گئیں۔
بین الاقوامی میڈیا کے مطابق یہ سفید رنگ کی چمکدار پتھروں سے مزین ایتھلیٹک جرابیں فرانس میں ایک نیلامی کے دوران فروخت ہوئیں۔ مائیکل جیکسن نے یہ جرابیں 1997 کے عالمی کنسرٹ ٹور کے دوران ایک اسٹیج پرفارمنس میں پہن رکھی تھیں، اور انہیں ان کے مشہور گانے “بلی جین” کی ویڈیو میں بھی پہنے ہوئے دیکھا جا سکتا ہے۔
نیلامی ادارے کی ترجمان آروئر الی نے بتایا کہ یہ نایاب جرابیں اس وقت کے ایک ٹیکنیشن کو کنسرٹ کے بعد مائیکل جیکسن کے ڈریسنگ روم کے قریب سے ملیں تھیں، اور تب سے انہیں 28 سال تک ایک فریم میں محفوظ رکھا گیا تھا۔
وقت گزرنے کے ساتھ ان جرابوں پر دھبے پڑ گئے اور ان پر جڑے چمکدار پتھر بھی اپنی چمک کھو بیٹھے، جس کا ذکر نیلامی کے اشتہار میں بھی کیا گیا۔ تاہم، ان کی تاریخی اہمیت اور مائیکل جیکسن سے وابستگی کی وجہ سے یہ جرابیں ابتدائی تخمینے سے کہیں زیادہ قیمت میں فروخت ہوئیں۔
ابتدائی طور پر ان کی قیمت 3,000 سے 4,000 یورو کے درمیان لگائی گئی تھی، مگر بالآخر یہ 7,688 یورو یعنی تقریباً 8,822 امریکی ڈالر میں نیلام ہوئیں۔ یہ نیلامی موسیقی اور یادگار اشیاء کے شوقین افراد کے لیے ایک نایاب موقع ثابت ہوئی۔
