راولپنڈی کی جانب رواں دواں اسلام آباد ایکسپریس کو کالا شاہ کاکو کے نزدیک ایک خطرناک حادثہ پیش آیا، جس کے نتیجے میں درجنوں مسافر زخمی ہوگئے۔ ابتدائی اطلاعات کے مطابق ٹرین کی کئی بوگیاں اور انجن پٹڑی سے اتر کر الٹ گئیں، جس کے باعث ٹریک پر ٹرینوں کی آمدورفت بھی معطل ہو گئی۔
ریلوے ذرائع کے مطابق حادثے کے باعث 28 افراد کے زخمی ہونے کی اطلاع ہے، جنہیں فوری طور پر ابتدائی طبی امداد دی جا رہی ہے۔ امدادی ٹیموں کو روانہ کر دیا گیا ہے، تاہم اب تک وہ جائے حادثہ تک نہیں پہنچ سکیں، جس کے باعث مسافر خود اپنی مدد آپ کے تحت امدادی سرگرمیوں میں حصہ لے رہے ہیں۔
اسلام آباد ایکسپریس شام 6 بجے لاہور سے روانہ ہوئی تھی اور راولپنڈی جا رہی تھی۔ حادثے کے بعد گرین لائن اور دیگر کئی ریل گاڑیاں بھی متاثر ہوئیں اور مختلف مقامات پر رک گئیں۔
وفاقی وزیر ریلوے حنیف عباسی نے واقعے کا نوٹس لیتے ہوئے ریلوے کے چیف ایگزیکٹو آفیسر اور ڈویژنل سپرنٹنڈنٹ کو فوراً جائے حادثہ پر پہنچنے کی ہدایت کی ہے۔ انہوں نے امدادی کارروائیاں تیز کرنے اور میڈیکل اسٹاف کو فوری پہنچانے کی بھی ہدایت دی ہے۔ ساتھ ہی حادثے کی وجوہات جاننے کے لیے انکوائری کا حکم دے دیا گیا ہے، جس کی رپورٹ 7 دن میں پیش کی جائے گی۔
وزیراعظم شہباز شریف نے بھی واقعے پر افسوس کا اظہار کرتے ہوئے ریسکیو آپریشن میں تیزی لانے کی ہدایت جاری کی ہے۔
