اداکار ہمایوں سعید نے اداکارہ ہانیہ عامر کی فلم سردار جی 3 اور فواد خان کی فلم عبیر گلال پر بھارت میں عائد پابندی کو افسوس ناک قرار دیا ہے۔
حالیہ دنوں میں جیو پوڈکاسٹ پر بطور مہمان شرکت کے دوران انہوں نے پاک بھارت تعلقات، پاکستانی فنکاروں کے مواقع اور دونوں ممالک میں فلموں کی ریلیز سے متعلق مختلف پہلوؤں پر اپنے خیالات کا اظہار کیا۔
میزبان کی جانب سے بھارتی سینما میں پاکستانی فلموں پر پابندی سے متعلق سوال پر ہمایوں سعید نے کہا کہ سردار جی 3 کو بھارت میں ریلیز ہونا چاہیے تھا، اور اس کی نمائش پر پابندی قابل افسوس ہے۔
انہوں نے کہا کہ عبیر گلال کی ریلیز مؤخر ہونے پر بھی افسوس ہے، حالانکہ اس فلم میں شامل کسی فنکار یا پروڈیوسر کی کوئی غلطی نہیں تھی۔ انہوں نے نیک نیتی کے ساتھ دونوں ممالک کے فنکاروں کو ایک پلیٹ فارم پر لا کر کام کیا۔
ہمایوں سعید کا کہنا تھا کہ کسی کو یہ اندازہ نہیں تھا کہ خطے میں کشیدگی بڑھے گی یا جنگ چھڑ سکتی ہے۔ ان کے مطابق بھارت کو چاہیے تھا کہ وہ ان فلموں کو ریلیز ہونے دیتا اور اگر کوئی مسئلہ تھا تو آئندہ کے لیے خبردار کرتا۔
انہوں نے بتایا کہ سردار جی 3 کو پاکستان میں ریلیز کرکے شائقین نے بھرپور پذیرائی دی، جو خوش آئند ہے، مگر فلم پروڈیوسر کو بھاری نقصان بھی اٹھانا پڑا۔
ہمایوں سعید نے واضح کیا کہ فلم کا اصل منافع بھارت، امریکا اور برطانیہ سے متوقع تھا، اور بھارتی مارکیٹ سے 40 سے 50 فیصد ریونیو کی امید تھی۔ پابندی کی وجہ سے یہ آمدن متاثر ہوئی، جو ایک بڑے مالی نقصان کی شکل اختیار کر گئی۔
