بھارتی میڈیا کے مطابق دہلی میں تین کمسن طلبہ صرف اس امید پر اپنے گھروں سے فرار ہو گئے کہ وہ بالی ووڈ کے مشہور اداکار سلمان خان سے ملاقات کر سکیں۔ ان بچوں کی عمریں 9، 11 اور 13 سال ہیں، اور وہ ایک ہی اسکول میں تعلیم حاصل کرتے ہیں۔
واقعے کے مطابق، ان میں سے ایک بچے نے گھر چھوڑنے سے قبل ایک تحریری نوٹ چھوڑا جس میں لکھا تھا کہ انہیں آن لائن گیمنگ پلیٹ فارم پر ایک شخص “واحد” نے بتایا ہے کہ وہ سلمان خان سے ملاقات کر چکا ہے اور بچوں کو بھی اس سے ملوایا جا سکتا ہے۔ اسی وجہ سے بچے ’جلنا‘ (مہاراشٹرا) میں واحد کے پاس جانے کے لیے روانہ ہو گئے، تاکہ بعد میں ممبئی جا کر اپنے پسندیدہ اداکار سے ملاقات کر سکیں۔
جب بچوں کی غیر موجودگی کا علم والدین کو ہوا تو انہوں نے فوری طور پر پولیس کو اطلاع دی، جس پر پولیس نے تحقیقاتی کارروائی شروع کی۔ بچوں کے موبائل ڈیٹا اور کال ریکارڈز کی مدد سے پولیس نے واحد نامی شخص تک پہنچنے کی کوشش کی، مگر جیسے ہی معاملہ پولیس تک پہنچا، وہ شخص بچوں کو ٹرین میں چھوڑ کر موقع سے فرار ہو گیا۔
پولیس نے بعد ازاں بچوں کو ناندیڑ کے قریب ناشق ریلوے اسٹیشن سے بحفاظت بازیاب کر لیا، جبکہ واحد کو اب تک گرفتار نہیں کیا جا سکا۔
