امریکی ریاست ہوائی میں سونامی کی وارننگ کے بعد بڑے پیمانے پر لوگوں کے انخلاء کا سلسلہ جاری ہے۔ جزیرہ اوواہو میں تقریباً چار فٹ بلند لہریں دیکھی گئی ہیں۔ ہوائی کی ہنگامی خدمات نے شہریوں کو تاکید کی ہے کہ وہ حکام کی اجازت کے بغیر متاثرہ علاقوں میں واپس نہ جائیں۔
امریکی میڈیا رپورٹس کے مطابق سونامی کی لہریں اب بھی ہوائی کو متاثر کر رہی ہیں اور وارننگ بدستور برقرار ہے۔ شہریوں کو تنبیہ کی گئی ہے کہ وہ انخلاء زون سے دور رہیں اور محفوظ مقامات پر منتقل ہو جائیں۔ ریاست کی پوری ساحلی پٹی کو خطرے کی زد میں قرار دے کر خالی کرا لیا گیا ہے۔
پیسیفک سونامی وارننگ سینٹر کے مطابق، سونامی کی پہلی لہریں ہوائی سے ٹکرا چکی ہیں اور مزید خطرناک لہروں کا امکان ہے۔ ادارے نے خبردار کیا ہے کہ شہریوں کی سلامتی کے لیے فوری اور مؤثر اقدامات ناگزیر ہیں۔ سونامی کا خطرہ کئی گھنٹوں تک برقرار رہ سکتا ہے۔
ہوائی کے گورنر جوش گرین نے بتایا ہے کہ اگرچہ فی الحال کوئی مہلک لہر نہیں آئی، لیکن پانی کی سطح میں نمایاں کمی دیکھی گئی ہے، جو کسی بڑی لہر کی آمد کا اشارہ ہو سکتی ہے۔ گورنر نے مزید کہا کہ حالات کو معمول پر آنے میں دو سے تین گھنٹے لگ سکتے ہیں۔
دوسری جانب، امریکی کوسٹ گارڈ نے تمام بندرگاہوں سے تجارتی جہازوں کو ہٹا دیا ہے اور نئے جہازوں کے داخلے پر پابندی لگا دی گئی ہے۔ قریبی سمندری علاقوں میں موجود بحری جہازوں کو ساحل کے قریب نہ آنے کی ہدایت دی گئی ہے جب تک کہ خطرہ مکمل طور پر ٹل نہ جائے۔ پروازوں کی نگرانی کرنے والی ویب سائٹس کے مطابق، ہوائی جانے والی کئی پروازوں کا رخ موڑ دیا گیا ہے اور کچھ کو واپس بھی بھیج دیا گیا ہے۔
گورنر جوش گرین نے مزید انکشاف کیا ہے کہ جاپان اور ہوائی کے درمیان واقع مڈ وے اٹول کے قریب سے چھ فٹ اونچی لہر گزری ہے اور ایک ممکنہ بڑی لہر کی آمد ابھی باقی ہے۔
یہ سب تب شروع ہوا جب روس کے ساحلی علاقوں میں 8.8 شدت کا شدید زلزلہ آیا، جس کے بعد نہ صرف امریکا بلکہ کئی دیگر ممالک نے بھی سونامی الرٹ جاری کر دیا ہے۔
