وزیراعلیٰ پنجاب مریم نواز شریف کی سرپرستی میں صوبے میں خصوصی بچوں کی تعلیم کے شعبے میں نمایاں ترقی سامنے آئی ہے۔
تاریخ میں پہلی مرتبہ پنجاب حکومت نے محکمہ خصوصی تعلیم اور برٹش کونسل کے درمیان ایک بین الاقوامی تعاون پر مبنی معاہدہ کیا ہے، جو اس شعبے میں اہم سنگ میل قرار دیا جا رہا ہے۔
اس معاہدے پر دستخط کی تقریب کے دوران معاون خصوصی برائے خصوصی تعلیم ثانیہ عاشق نے برٹش کونسل کے کنٹری ڈائریکٹر جیمز ہیمپسن کو حکومت پنجاب کے اقدامات سے آگاہ کیا۔ برٹش کونسل نے اس شعبے میں تکنیکی تعاون فراہم کرنے کی یقین دہانی کرائی۔
تقریب کے دوران “سکول کنیکٹ پروگرام” کے تحت نمایاں کارکردگی دکھانے والے اسکول سربراہان کو “ایوارڈز آف ایکسیلنس” سے نوازا گیا۔
ثانیہ عاشق نے کہا کہ خصوصی بچوں کی تعلیم و تربیت کو پنجاب حکومت نے اپنی اولین ترجیحات میں شامل کیا ہے۔ ان کا کہنا تھا کہ اساتذہ کے لیے بین الاقوامی تربیتی تبادلہ پروگرام نہایت ضروری ہیں، اور آٹزم و شمولیاتی تعلیم کے حوالے سے برطانیہ کے تجربات سے بھرپور فائدہ اٹھانا چاہتے ہیں۔ وزیراعلیٰ پنجاب مریم نواز کا وژن ہر بچے کو تعلیم، صحت اور باعزت زندگی فراہم کرنا ہے۔
اس موقع پر برٹش کونسل کے کنٹری ڈائریکٹر جیمز ہیمپسن نے کہا کہ وہ پنجاب میں خصوصی بچوں کو بااختیار بنانے کے لیے ایک نیا باب رقم کرنے میں مکمل تعاون فراہم کریں گے۔
