کراچی کے ایک معروف نجی ہوٹل میں وفاقی وزیر برائے منصوبہ بندی احسن اقبال کی سربراہی میں فلم اور ڈراما انڈسٹری سے وابستہ شخصیات کے ساتھ ایک اہم راؤنڈ ٹیبل اجلاس منعقد ہوا، جس کا مقصد پاکستان کی تخلیقی معیشت کو مضبوط بنیادوں پر استوار کرنا تھا۔
اجلاس میں ملک کے ممتاز فلم میکرز، ہدایت کاروں اور اداکاروں نے شرکت کی۔ اس نشست کا مقصد ثقافتی ورثے اور تخلیقی صلاحیتوں کو ملکی ترقی کے عمل میں شامل کرنا تھا، کیونکہ ثقافت کسی بھی معاشرے کی شناخت اور فکری ارتقاء کی نمائندہ ہوتی ہے۔
وفاقی وزیر احسن اقبال نے اس موقع پر گفتگو کرتے ہوئے کہا کہ فلم و ڈراما صرف تفریحی ذرائع نہیں بلکہ سماجی شعور، قومی یکجہتی اور مثبت تشخص کو اجاگر کرنے کا موثر ذریعہ بھی ہیں۔ انہوں نے زور دیا کہ تخلیقی صنعتیں پاکستان کی معیشت میں اہم کردار ادا کر سکتی ہیں، بشرطیکہ انہیں ادارہ جاتی سرپرستی اور ضروری وسائل فراہم کیے جائیں۔
ان کا مزید کہنا تھا کہ فلم اور ڈراما کے شعبوں میں سرمایہ کاری اور پالیسی سازی کے ذریعے نہ صرف روزگار کے مواقع پیدا کیے جا سکتے ہیں بلکہ پاکستان کی ثقافت اور سافٹ امیج کو عالمی سطح پر بہتر انداز میں پیش کیا جا سکتا ہے۔
