ایک بار پھر سوشل میڈیا پر 37 سال بعد غائب طیارے کی واپسی کی کہانی گردش کر رہی ہے، تاہم حقیقت میں یہ محض ایک من گھڑت قصہ ہے۔ حالیہ دنوں میں متعدد افراد نے ایک پوسٹ شیئر کی جس میں دعویٰ کیا گیا کہ “پین ایم فلائٹ 914” نامی ایک پرواز 1955 میں نیویارک سے روانہ ہوئی، اچانک لاپتا ہوگئی اور 1992 میں اچانک میامی، فلوریڈا میں لینڈ کر گئی۔
اس افسانوی داستان میں کہا گیا کہ طیارے میں سوار 57 مسافر اور عملہ حیران تھے کہ وہ کہاں ہیں، کیونکہ ان کے بقول ان کے لیے وقت کا سفر محض چند لمحوں جیسا تھا، جبکہ حقیقت میں 37 سال گزر چکے تھے۔
تاہم تحقیق سے معلوم ہوتا ہے کہ یہ واقعہ سراسر جھوٹ ہے۔ دراصل یہ کہانی سب سے پہلے 1985 میں امریکا کے ایک مشہور لیکن غیر معتبر ٹیبلوئڈ “ویکلی ورلڈ نیوز” میں شائع ہوئی تھی، جو کہ فرضی اور سنسنی خیز خبروں کی اشاعت کے لیے جانا جاتا تھا۔
یہی میڈیا ادارہ بعد میں بھی اسی واقعے کو مختلف انداز میں چھاپتا رہا، مگر ہر بار “ایئر ٹریفک کنٹرولر” کی تصویر اور تفصیلات بدل دی گئیں، جو اس بات کا واضح ثبوت ہے کہ یہ محض افسانہ تھا۔
فیس بک پر گردش کرنے والی پوسٹ میں جو ویڈیو یا تصویر دکھائی گئی، وہ درحقیقت ایک پرانی اسٹاک فوٹو ہے جو 1935 میں لی گئی تھی اور اس کا پین ایم فلائٹ 914 سے کوئی تعلق نہیں۔
امریکی محکمہ ٹرانسپورٹ کے فضائی حادثات کے سرکاری ریکارڈ (1934 تا 1965) میں بھی اس پرواز یا کسی مشابہ واقعے کا کوئی اندراج موجود نہیں ہے۔
علاوہ ازیں، جعلی خبروں کو بے نقاب کرنے والی معروف ویب سائٹ “اسنوپس” نے بھی 2019 میں اس کہانی کو جھوٹا اور بے بنیاد قرار دیا تھا۔
