چین کے دارالحکومت بیجنگ میں طوفانی بارشوں اور شدید سیلاب کے نتیجے میں 30 افراد ہلاک ہو گئے ہیں۔ مقامی حکام کے مطابق ہلاکتوں کا سب سے زیادہ اندوہناک منظر شہر کے شمال مشرقی علاقے “می یون” ضلع میں سامنے آیا، جہاں کئی اموات رپورٹ ہوئیں۔
برطانوی خبر رساں اداروں کے مطابق چین کے شمالی علاقوں میں موسلا دھار بارشوں کے باعث صورتحال سنگین ہو گئی ہے، جس کے نتیجے میں 80 ہزار سے زائد افراد کو اپنے گھر چھوڑنے پر مجبور ہونا پڑا۔
ریسکیو ادارے متحرک ہو چکے ہیں اور متاثرہ افراد کو محفوظ مقامات پر منتقل کیا جا رہا ہے۔ رپورٹ کے مطابق سیلاب کی وجہ سے کئی اہم شاہراہیں بند ہو چکی ہیں، جبکہ متعدد دیہات بجلی کی فراہمی سے محروم ہیں۔
چینی صدر شی جن پنگ نے ریسکیو کارروائیوں کو تیز کرنے کی ہدایت دیتے ہوئے کہا ہے کہ زیادہ سے زیادہ جانوں کو بچانے کے لیے ہر ممکن کوشش کی جائے۔
