روانڈا میں منعقد ہونے والے بین الاقوامی “اوبومنٹو آرٹس فیسٹیول 2025” میں پاکستان کی نمائندگی آرٹس کونسل آف پاکستان کراچی نے کی۔ اس عالمی ثقافتی میلے میں آرٹس کونسل میوزک اکیڈمی کے ڈائریکٹرز اور نمایاں موسیقاروں نے شرکت کی۔
فیسٹیول میں
“The Loudest Whisper”
کے عنوان سے ایک ڈرامائی میوزیکل پیشکش پیش کی گئی، جس میں ارمان رحیم، احسن باری، جہانزیب شاہ (گزری)، مصطفیٰ بلوچ اور امیش لدھانی نے حصہ لیا۔ اس پراثر پرفارمنس میں دنیا بھر میں بے گناہ انسانوں کے قتل عام اور اس پر عالمی خاموشی کو موضوع بنایا گیا، جس نے شرکاء پر گہرا اثر چھوڑا۔
پرفارمنس کے ذریعے یہ پیغام دیا گیا کہ عالمی سطح پر ہونے والے مظالم پر خاموشی اختیار کرنا ایک سنگین المیہ ہے۔ ثقافتی وفد کی اس پیشکش کو بین الاقوامی سطح پر سراہا گیا، اور اسے فیسٹیول کی نمایاں جھلکیوں میں شمار کیا گیا۔
اس عالمی ثقافتی جشن میں دنیا کے 12 سے زائد ممالک نے شرکت کی، جن میں امریکا، سری لنکا، جنوبی افریقہ، کانگو، کینیا، نائیجیریا، تنزانیہ، یوگنڈا، فرانس، نیدرلینڈز، برونڈی، نیپال، زمبابوے اور میزبان ملک روانڈا شامل تھے۔
پاکستانی وفد کی قیادت میوزک اکیڈمی کے ڈائریکٹر اور معروف گلوکار ارمان رحیم نے کی، جن کے ہمراہ احسن باری، جہانزیب علی شاہ (گزری)، مصطفیٰ بلوچ، اور ڈپٹی ڈائریکٹر اکیڈمیز امیش لدھانی نے آرٹس کونسل آف پاکستان کراچی کی نمائندگی کی۔
اس فیسٹیول کا بنیادی مقصد موسیقی اور فن کے ذریعے امن، رواداری اور ثقافتی ہم آہنگی کو فروغ دینا تھا، جس میں پاکستانی فنکاروں نے بھرپور انداز میں اپنا مثبت کردار ادا کیا۔
