خیبرپختونخوا حکومت نے ناران، کاغان، جھیل سیف الملوک سمیت متعدد مشہور سیاحتی مقامات پر داخلے کے لیے انٹری فیس لازمی قرار دے دی ہے۔ میڈیا ذرائع کے مطابق اب ان علاقوں میں جانے والے تمام سیاحوں کو مقررہ فیس ادا کرنی ہوگی، بصورت دیگر داخلے کی اجازت نہیں دی جائے گی۔
سرکاری ریکارڈ کے مطابق کاغان ویلی میں انٹری فیس کے باقاعدہ نفاذ کا فیصلہ کیا گیا ہے۔ اس مقصد کے لیے حسام آباد کے مقام پر چیک پوائنٹ قائم کیا جائے گا جہاں مختلف گاڑیوں کے لیے علیحدہ فیس مقرر کی گئی ہے: بڑی گاڑی کے ہر فرد سے 200 روپے، چھوٹی گاڑی کے مسافروں سے 100 روپے، اور موٹر سائیکل سواروں سے 20 روپے وصول کیے جائیں گے۔ تاہم وہاں کے رہائشی مقامی افراد کو اس فیس سے مستثنیٰ رکھا گیا ہے۔
محکمہ سیاحت کے سیکرٹری ڈاکٹر عبدالصمد کے مطابق انٹری فیس کا نفاذ سیاحتی انفراسٹرکچر کی بہتری، سہولیات کی فراہمی اور ریونیو بڑھانے کے لیے کیا گیا ہے۔ انہوں نے کہا کہ اس اقدام سے کاغان ڈویلپمنٹ اتھارٹی کو مالی مدد ملے گی اور سیاحوں کو بہتر سہولیات مہیا کی جا سکیں گی۔ بورڈ آف گورنرز کی منظوری کے بعد اس فیصلے پر جلد عمل درآمد شروع کر دیا جائے گا۔
مزید برآں، محکمہ سیاحت نے صوبے بھر میں سیاحوں کے لیے ایک ایڈوائزری بھی جاری کی ہے۔ حکام نے خبردار کیا ہے کہ 29 جولائی تک شدید بارشوں کی وجہ سے فلیش فلڈز کا خطرہ موجود ہے، لہٰذا سیاح غیر ضروری سفر سے پرہیز کریں اور دریا کے کناروں پر جانے سے گریز کریں۔ کسی بھی سیاحتی مقام کا رخ کرنے سے پہلے ہیلپ لائن 1422 پر کال کر کے صورتحال سے آگاہی حاصل کرنے کی بھی ہدایت کی گئی ہے۔
