لاہور: لیسکو حکام نے ڈیوس روڈ پر واقع ایک نجی ہوٹل میں بجلی چوری کا بڑا اسکینڈل بے نقاب کر دیا، جس میں 2 کروڑ 63 لاکھ روپے مالیت کی بجلی چوری کیے جانے کا انکشاف ہوا ہے۔
ذرائع کے مطابق، ہوٹل میں نصب تین تھری فیز میٹرز کے ساتھ چھیڑ چھاڑ کر کے میٹرز کو ری پروگرام کیا گیا، سیکیورٹی سسٹم کو بائی پاس کیا گیا، اور ریڈنگز کو فریز کر دیا گیا تاکہ بجلی کے استعمال کو چھپایا جا سکے۔ اس جعلسازی کے باعث لیسکو کو پہلے میٹر سے 98 لاکھ، دوسرے سے 70 لاکھ اور تیسرے میٹر سے 95 لاکھ روپے کا مالی نقصان برداشت کرنا پڑا۔
لیسکو کے ترجمان نے بتایا کہ ہوٹل انتظامیہ مارچ 2023 سے ریڈنگ فریز رکھ کر مسلسل بجلی چوری کر رہی تھی۔ لیسکو اور رینجرز نے مشترکہ کارروائی کرتے ہوئے مشتبہ میٹرز کو تحویل میں لے لیا ہے۔ واقعے کی سنگینی کو دیکھتے ہوئے نجی ہوٹل کے مالکان کے خلاف ایف آئی آر درج کرا دی گئی ہے، جس کی بنیاد پر مزید قانونی کارروائی عمل میں لائی جائے گی۔
