پنجاب حکومت نے اسموگ اور بڑھتی ہوئی فضائی آلودگی پر قابو پانے کے لیے جدید ٹیکنالوجی متعارف کرانے کا فیصلہ کیا ہے۔ اس مقصد کے تحت محکمہ ماحولیات نے ایک نئی قسم کی گاڑی کی آزمائش شروع کر دی ہے۔
محکمہ ماحولیات کے ذرائع کے مطابق یہ خصوصی گاڑی، جسے ڈسٹ سپریشن وہیکل کہا جا رہا ہے، گرد و غبار کم کرنے کے لیے پانی کے اسپرے کا استعمال کرتی ہے۔ گاڑی چاروں طرف پانی کا چھڑکاؤ کرنے کی صلاحیت رکھتی ہے، اور یہ فضا میں 120 میٹر کی دوری تک پانی کے ذرات پھیلانے کی طاقت رکھتی ہے۔
ذرائع نے مزید وضاحت کی کہ یہ گاڑی جدید مسٹ فین ٹیکنالوجی پر مبنی ہے، جو باریک پانی کے بخارات کے ذریعے گرد کو نیچے گرا کر ہوا کو صاف رکھنے میں مدد دیتی ہے۔
حکام کا ماننا ہے کہ اس نئی ٹیکنالوجی کی مدد سے شہری علاقوں میں اسموگ اور مٹی کے ذرات کو مؤثر طریقے سے قابو میں لایا جا سکے گا، خاص طور پر ان دنوں میں جب فضائی معیار خطرناک سطح تک پہنچ جاتا ہے۔
