پشاور کے تاریخی علاقے میں واقع بالی ووڈ کے عظیم فنکار دلیپ کمار اور راج کپور کی آبائی حویلیوں کو اصل طرزِ تعمیر کے مطابق دوبارہ بحال کرنے کا باقاعدہ آغاز کر دیا گیا ہے۔
خیبرپختونخوا کے سیکرٹری آثارِ قدیمہ، ڈاکٹر عبدالصمد نے بتایا کہ یہ منصوبہ دو سال کی مدت میں مکمل کیا جائے گا، جس پر کل 7 کروڑ روپے کی لاگت آئے گی۔
انہوں نے مزید کہا کہ بحالی کے بعد ان حویلیوں کو عوام اور سیاحوں کے لیے کھول دیا جائے گا، تاکہ مقامی و بین الاقوامی سیاحت کو فروغ دیا جا سکے۔ یہ منصوبہ سابق حکومت کے دور میں ترتیب دیا گیا تھا، لیکن مالی وسائل کی کمی کے باعث مکمل نہ ہو سکا تھا۔
یاد رہے کہ دلیپ کمار اور راج کپور کا تعلق پشاور کے قدیم شہر سے تھا، اور ان کی یہ رہائشگاہیں اب قومی ثقافتی ورثے کا درجہ رکھتی ہیں۔
محکمہ آثار قدیمہ کی جانب سے ان عمارات کو تاریخی حیثیت کے ساتھ محفوظ رکھنے اور ان کی اصل فن تعمیر کو بحال کرنے کے لیے خصوصی اقدامات کیے جا رہے ہیں، تاکہ آنے والی نسلیں اس ورثے سے واقف ہو سکیں۔
