ڈائریکٹر جنرل انٹرسروسز پبلک ریلیشنز، لیفٹیننٹ جنرل احمد شریف چوہدری نے گورنمنٹ کالج یونیورسٹی لاہور کے طلبہ کے ساتھ خصوصی ملاقات میں آپریشن بنیان مرصوص کی شاندار کامیابی کے مختلف پہلوؤں پر تفصیلی روشنی ڈالی۔ پاک فوج کے ترجمان ادارے کے مطابق، اس نشست کے دوران ڈی جی آئی ایس پی آر نے بھارت کے آپریشن سندور کو ناکام بنانے اور آپریشن بنیان مرصوص کی فتح پر گفتگو کی اور خاص طور پر نوجوانوں کے جذبے، حب الوطنی اور سوچ کی تعریف کی۔
اس موقع پر طلبہ نے قومی و معاشرتی امور خصوصاً سکیورٹی کے حوالے سے سوالات کیے، جس کا ڈی جی آئی ایس پی آر نے بھرپور جواب دیا۔ نشست کے اختتام پر طلبہ نے ملی نغموں کے ذریعے پاک فوج کو خراجِ تحسین پیش کیا اور قومی اتحاد کی ترجمانی کی۔ گورنمنٹ کالج یونیورسٹی کے طلبہ نے اس نشست کو نہایت مثبت قرار دیتے ہوئے مستقبل میں بھی ایسی ملاقاتوں کے انعقاد کی خواہش ظاہر کی۔
گزشتہ روز لاہور میں مختلف مذاہب کے نمائندوں اور نوجوانوں کے ساتھ ایک اور خصوصی ملاقات میں لیفٹیننٹ جنرل احمد شریف چوہدری نے آپریشن بنیان مرصوص میں پاک فوج کی کامیابی کو پوری قوم کی فتح قرار دیا۔ انہوں نے کہا کہ قوم مذہب کی تفریق کے بغیر دشمن کے خلاف مضبوطی سے کھڑی ہوتی ہے۔ پاکستان میں تمام مذاہب کے لوگ یک دل و یک جان ہیں اور بین المذاہب ہم آہنگی ہماری قومی طاقت کی بنیاد ہے۔ انہوں نے نوجوانوں کے کردار کو ملک کے روشن مستقبل کے لیے نہایت اہم قرار دیا اور کہا کہ پاکستان ایک پرامن اور ترقی پسند ملک ہے۔
