پاکستانی شوبز انڈسٹری کے معروف اداکار ہمایوں سعید نے 2005 کے زی سنیما ایوارڈز میں شاہ رخ خان اور پریتی زنٹا کے ساتھ ڈانس کرنے کے دلچسپ واقعے کی یاد تازہ کر دی۔
ایک حالیہ پوڈکاسٹ میں گفتگو کرتے ہوئے ہمایوں سعید نے بتایا کہ وہ اس تقریب میں پاکستان سے ریما، عدنان صدیقی اور دیگر فنکاروں کے ساتھ لندن گئے تھے۔ دورانِ پرواز ان کے ساتھی اداکار فخر امام نے مذاق میں کہا، “سوچو اگر شاہ رخ خان تمہیں اسٹیج پر بلا کر ڈانس کرنے کو کہے تو؟” ہمایوں نے اس بات کو ہنسی میں اڑا دیا اور سفر جاری رکھا۔
تاہم، جب وہ لندن ایئرپورٹ پر پہنچے تو انہیں باقی فنکاروں کے بجائے علیحدہ بس میں بٹھایا گیا۔ استفسار پر علم ہوا کہ اُنہیں فوری ریہرسل کے لیے لے جایا جا رہا ہے، کیونکہ اگلے روز ان کی شاہ رخ خان اور پریتی زنٹا کے ساتھ مشترکہ ڈانس پرفارمنس شیڈول تھی۔ ہمایوں سعید کے مطابق، وہ اس اطلاع پر حیران رہ گئے کیونکہ فخر کی مذاق میں کہی ہوئی بات سچ ثابت ہو گئی تھی۔
شاہ رخ خان سے ملاقات کے حوالے سے ہمایوں کا کہنا تھا کہ “انہوں نے نہایت گرمجوشی سے ملاقات کی جیسے پرانے جاننے والے ہوں، اور ڈانس اسٹیپس میں میری رہنمائی بھی کی۔”
اس شاندار ایوارڈ شو میں بھارتی اور پاکستانی فنکاروں نے مل کر پرفارم کیا، جسے اسٹیڈیم میں موجود تقریباً 50 سے 60 ہزار ناظرین نے زبردست تالیاں بجا کر سراہا۔ ہمایوں نے بتایا کہ یہ تجربہ ان کے کیریئر کے یادگار لمحات میں سے ایک تھا۔
یاد رہے، اس مشترکہ پرفارمنس میں شاہ رخ، پریتی زنٹا، ریما اور ہمایوں سعید نے مل کر ایسا شو پیش کیا جسے آج بھی شائقین ایک تاریخی لمحہ قرار دیتے ہیں۔
