سبزی فروش کا بیٹا میٹرک میں نمایاں کامیابی کے ساتھ نمایاں طلبہ کی صف میں شامل

لاہور بورڈ کے تحت میٹرک امتحانات 2025 کے نتائج میں ایک متاثر کن مثال اس وقت سامنے آئی جب گورنمنٹ ہائی اسکول نمبر 1 شاہکوٹ کے ہونہار طالبعلم ملک فیضان رضا نے سائنس گروپ (لڑکوں) میں نمایاں نمبر لے کر تیسری پوزیشن حاصل کی۔

فیضان رضا، جو ایک سبزی فروش کے بیٹے ہیں، نے وسائل کی کمی کے باوجود 1186 نمبر حاصل کیے اور یہ ثابت کر دیا کہ محنت، عزم اور لگن انسان کو کامیابی کی بلندیوں پر لے جا سکتے ہیں۔

فیضان کا کہنا تھا، “میرے اساتذہ نے میرے ساتھ بے پناہ محنت کی، اور میرے والدین کی دعائیں اور تعاون ہر لمحے میرے ساتھ رہے۔”

اسکول کے پرنسپل نے فیضان کی اس شاندار کامیابی کو سراہتے ہوئے کہا کہ وہ نہ صرف اپنے والدین بلکہ پورے اسکول کے لیے فخر کا باعث بنے ہیں، اور ان کی یہ کامیابی محدود وسائل رکھنے والے دیگر طلبہ کے لیے ایک امید کی کرن ہے۔

یاد رہے کہ لاہور بورڈ نے حال ہی میں میٹرک کے نمایاں پوزیشن ہولڈرز کا اعلان کیا ہے۔ اس سال حرم فاطمہ نے 1193 نمبر لے کر مجموعی طور پر پہلی پوزیشن حاصل کی، جب کہ نور الہدیٰ اور حاجی ابو زر تنویر نے 1188 نمبر کے ساتھ دوسری پوزیشن حاصل کی۔ محمد علی 1187 نمبر کے ساتھ تیسرے نمبر پر رہے۔ سائنس گروپ (لڑکوں) میں، حاجی ابو زر پہلے، محمد علی دوسرے اور ملک فیضان رضا و محمد ذہیب صدیق نے مشترکہ طور پر تیسری پوزیشن حاصل کی۔