روس کے مشرقی حصے میں ایک مسافر طیارہ، جس میں 50 سے زائد افراد سوار تھے، حادثے کا شکار ہوگیا۔ عالمی خبر رساں ادارے رائٹرز کے مطابق طیارہ مشرق بعید کے علاقے میں پرواز کے دوران اچانک ریڈار سے غائب ہوگیا۔ علاقائی گورنر کے مطابق جمعرات کے روز ایئر ٹریفک کنٹرول کا طیارہ A24 سے رابطہ اچانک منقطع ہوگیا۔
حادثے کے فوری بعد سرچ آپریشن شروع کیا گیا، جس میں امدادی ٹیموں کو ٹائنڈا شہر سے تقریباً 15 کلومیٹر کے فاصلے پر طیارے کا ملبہ مل گیا۔ حکام نے خدشہ ظاہر کیا ہے کہ اس اندوہناک واقعے میں تمام افراد جان سے ہاتھ دھو بیٹھے ہیں۔
روسی وزارت برائے ہنگامی صورتحال کے مطابق، یہ طیارہ انگارا ایئر لائن کی ملکیت تھا جو سائبیریا سے اُڑان بھر کر امور ریجن کے قصبے ٹائنڈا کی طرف جا رہا تھا، جو چین کی سرحد کے قریب واقع ہے۔ ابتدائی معلومات کے مطابق طیارے میں 43 مسافر (جن میں 5 بچے شامل تھے) اور 6 عملے کے افراد سوار تھے۔ حادثے کے بعد ریسکیو ٹیموں، ہیلی کاپٹروں اور دیگر وسائل کو فوری طور پر متحرک کیا گیا، جس کے نتیجے میں ملبہ تو مل گیا، لیکن کسی مسافر کے زندہ بچنے کے آثار نظر نہیں آ رہے۔
