The Karakoram Club
Ehsan Ullah
کے ٹو سر کرنے والے کوہ پیما اچانک منہ اٹھا کر چوٹی سر کرنے نہیں چل دیتے بلکہ اس کی باقاعدہ تیاری و تربیت ہوتی ہے. انتہائی تجربہ کار کوہ پیما بھی اس کے بعد ویدر ونڈو کا انتظار کرتے ہیں. یہ بمشکل ایک ہفتہ دس دن کا وقت ہوتا ہے جس میں آپ اوپر جا کر پھر نیچے پہنچ سکتے ہیں.
ان ہی پہاڑوں کے دامن میں سیاحت ہوتی ہے جہاں عام لوگ سیاح بن کر جاتے ہیں. دُنیا بھر میں سیاحت کی حوصلہ افزائی ہوتی ہے. لیکن دُنیا بھر میں اس کے قوانین اور اصول بھی ہیں. مثلاً نیپال جیسے ملک میں بھی کوئی سیاح رجسٹریشن اور گائیڈ کے بغیر پہاڑوں میں نہیں جا سکتا. سوئٹزرلینڈ اٹلی ترکی ناروے جیسے ممالک میں ریسکیو اور کمیونیکیشن اتنی بہترین ہے کہ گائیڈ کی بھی ضرورت نہیں.
اس کے باوجود پہاڑوں کی سیاحت کی ایک ویدر ونڈو ہوتی ہے. مثلاً آپ کے ٹو سر کرنے جائیں تو یہ ویدر ونڈو جولائی کے درمیان سے اگست تک بنتی ہے. لیکن پہاڑوں میں نیچے یہ ویدر ونڈو شدید بارشوں لینڈ سلائیڈنگ اور ابتر راستوں کا وقت ہوتا ہے.
ہمارے ہاں مسئلہ یہ ہے کہ سیاحت کی کوئی باقاعدہ رجسٹریشن ہی نہیں ہے. یعنی جاتے ہوئے نام لکھ بھی لیا تو آتے ہوئے کوئی ترتیب نہیں. نہ تجربہ کار لائسنس یافتہ ٹور گائیڈ ہوتے ہیں نہ راستے سڑکیں پل اس معیار پر ہیں جن پر بھروسہ کیا جا سکے. ریسکیو کے سرکاری ادارے یا تو بہت کم ہیں یا ان کے پاس مطلوبہ سامان ہی دستیاب نہیں ہوتا.
اس سب کا نتیجہ وہی نکلتا ہے جو ہم ایسے سیزن میں کبھی مری کبھی سوات کبھی چلاس میں قیمتی جانیں ضائع کر کے دیکھتے ہیں. عام سیاحت بھی کے ٹو سر کرنا بن جاتی ہے.
===================
بارشوں کے باعث 26 جون سے اب تک 252 افراد جاں بحق، این ڈی ایم اے
بارشوں سے جانی اور مالی نقصانات کے حوالے سے نیشنل ڈیزاسٹر منیجمنٹ اتھارٹی (این ڈی ایم اے) کا کہنا ہے کہ ملک بھر میں 24 گھنٹوں میں بارشوں کے باعث 10 افراد جاں بحق اور 13 زخمی ہوئے۔
این ڈی ایم اے کے مطابق جاں بحق ہونے والوں میں 2 مرد، 3 خواتین اور 5 بچے شامل ہیں، بارشوں کے باعث پنجاب میں 4 افراد جاں بحق اور 7 زخمی ہوئے۔
این ڈی ایم اے کے مطابق بارشوں سے خیبر پختونخوا میں 4 افراد جاں بحق اور 3 زخمی ہوئے جبکہ گلگت بلتستان میں 2 اموات ہوئیں۔
این ڈی ایم اے کے مطابق بارشوں کے باعث 26 جون سے اب تک 252 افراد جاں بحق اور 611 زخمی ہوچکے، سب سے زیادہ پنجاب میں 139 افراد جاں بحق اور 477 زخمی ہوئے۔
این ڈی ایم اے کے مطابق 26 جون سے ابتک بارشوں سے خیبر پختونخوا میں 60 افراد جاں بحق، 74 زخمی، سندھ میں 24 افراد جاں بحق، 40 زخمی جبکہ بلوچستان میں اب تک 16 افراد جاں بحق اور 4 زخمی ہوئے ہیں۔
بارشوں سے گلگت بلتستان میں 5 افراد جاں بحق اور 4 زخمی ہوئے جبکہ آزاد کشمیر میں اب تک 2 افراد جاں بحق اور 9 زخمی ہوئے۔
بارشوں کے باعث 24 گھنٹوں میں 151 مکانات منہدم ہوئے اور 120 مویشی ہلاک ہوئے۔
