کراچی کے بلدیاتی نظام پر پی ایچ ڈی کی پہلی ڈگری تفویض کر دی گئی

جامعہ کراچی کے33 ویں کانوکیشن میں بلدیہ عظمیٰ کراچی کے میڈیا کنسلٹنٹ /کوآرڈینیٹر، براڈ کاسٹر اور محقق علی حسن ساجد کو شعبہ ابلاغ عامہ میں کراچی کے بلدیاتی نظام اور ارتقاء کے موضوع پر پی ایچ ڈی کی اعلیٰ ترین ڈگری تفویض کی گئی، پاکستان بھر کی جامعات میں کراچی کے بلدیاتی نظام پر یہ پہلی ڈگری ہے، ڈگری وصول کرنے کے بعد علی حسن ساجد پاکستان بھر میں بلدیاتی نظام پر پی ایچ ڈی کرنے والے پہلے ریسرچر بن گئے ہیں، علی حسن ساجد کا نام ادب، تحقیق اور براڈ کاسٹنگ میں کسی تعارف کا محتاج نہیں ہے، انہوں نے لکھنے کی ابتداء بچوں کے ادب سے کی اور اس حوالے سے کئی کتابیں تحریر کیں، کہانیاں اور مضامین لکھے اور پھر کراچی کی تاریخ، تحقیق،تہذیب و ثقافت اور بلدیات کو بھی اپنا موضوع بنا لیا،کراچی کی تاریخی عمارات، مقامات اور تہذیب و ثقافت سے متعلق ان کے لاتعداد مضامین مختلف اخبارات و رسائل میں شائع ہوچکے ہیں، علی حسن ساجد کی کئی کتابیں بھی منظر عام پر آچکی ہیں، جن میں کراچی کی تاریخی عمارات،کراچی میں بلدیاتی نظام و انتخابات، یونین کونسل کے اختیارات و فرائض، ٹاؤن انتظامیہ کے اختیارات و فرائض اور دیگر شامل ہیں، اسی طرح بچوں کے لئے بھی انھوں نے متعدد کتابیں جن میں بڑھتے چلو، عقلمند لڑکا، بچوں کے فیض احمد فیض، بچوں کے کمال احمد رضوی، بچوں کی پیاری پیاری نظمیں اور دیگر شامل ہیں، علی حسن ساجد 1989ء سے بحیثیت نیوز کاسٹر پاکستان ٹیلی ویژن سے بھی وابستہ ہیں، خبریں اور دستاویزی پروگراموں کے ساتھ ساتھ اب تک سینکڑوں ڈاکیومینٹریز اور کمرشل اشتہارات میں اپنی آواز کا جادو جگا چکے ہیں، انہیں پی ٹی وی کے سب سے سینئر اور طویل عرصے تک نیوز کاسٹنگ کا اعزاز بھی حاصل ہے، ریڈیو پاکستان کراچی میں بھی ان کا شمار مقبول ترین کمپیئر میں ہوتا ہے، انہوں نے پی ٹی وی اور ریڈیو پر مختلف پروگراموں کے اسکرپٹ اور دستاویزی پروگرام بھی تحریر کئے، بین الاقوامی کانفرنسز، سیمینارز اور مطالعاتی دوروں کے سلسلے میں کئی ممالک کا دورہ کرچکے ہیں، ان کی کارکردگی کے اعتراف میں امریکہ کے ادارے اے بی آئی نے دنیا کی معروف شخصیات کی ڈائریکٹری کے آٹھویں ایڈیشن میں اشاعت کے لئے اورWho is Who میں پاکستان سے ان کا نام منتخب کیا ہے جو ایک منفرد اعزاز ہے، پاکستان میں بلدیاتی نظام کے حوالے سے پی ایچ ڈی کی پہلی ڈگری تفویض ہونے پر میئر کراچی بیرسٹر مرتضیٰ وہاب، ڈپٹی میئر کراچی سلمان عبداللہ مراد، میونسپل کمشنر افضل زیدی، سابق وفاقی وزیر مذہبی امور انیق احمد، جنرل منیجر پی ٹی وی امجد شاہ، آرٹس کونسل آف پاکستان کے صدر احمد شاہ، سابق کمشنر کراچی محمد حسین سید، افتخار علی شلوانی، وفاقی ایڈیشنل سیکریٹری صحت لئیق احمد، ڈائریکٹر جنرل نیپا ڈاکٹر سید سیف الرحمن، ملک کے ممتاز ادیبوں، شاعروں، دانشوروں اور محققین نے علی حسن ساجد کو پی ایچ ڈی کی ڈگری ملنے پر مبارکباد دی ہے