وینکور کا شہر برنابی (Burnaby) قدرتی حسن کا اعلیٰ شاہکار ہے
جدید اور قدیم معاشرت کی جھلک اس شہر میں دیکھی جا سکتی ہے
برنابی کو اونچے اور قدآور درختوں کے لیے دنیا بھر میں شہرت حاصل ہے
مسرور احمد مسرور
=============
کینیڈا کے صوبے برٹش کولمبیا کو سب سے زیادہ رہنے لائق صوبہ مانا جاتا ہے جس کے تحت 53 بلدیاتی علاقے ہیں جنہیں شہر کے برابر درجہ حاصل ہے، ان شہروں میں بھی چند شہر ایسے ہیں جو آبادی، زمینی رقبے، تعلیمی معیار اور معاشی اعتبار سے بہت نمایاں طور پر سامنے آتے ہیں، ان میں وینکور سر فہرست ہے جب کہ سری دوسرے اور برنابی (Burnaby) تیسرے نمبر پر آتا ہے۔
برنابی (Burnaby) ایک چھوٹا شہر ہے لیکن اپنے اندر مختلف وجوہات کی بنا پر ایک خاص کشش رکھتا ہے۔ یہ شہر قدیم اور جدید معاشرت کے حسین امتزاج کی خوبصورت عکاسی کرتا ہے۔ یہ وینکور کے بالکل مشرق میں واقع ہے اس کی آبادی تین لاکھ سے بھی کم ہی بتائی جاتی ہے۔ اس شہر کی خاص بات یہ ہے کہ قدرتی حسن کا شاہکار نظر آتا ہے، دوسرے یہ کہ اس کے رقبے کا 25 فی صد حصہ باغات اور کھلی جگہوں پر مشتمل ہے جو شمالی امریکا میں سب سے زیادہ تناسب میں شمار ہوتا ہے، یہاں سینٹرل پارک جہاں قدیم درخت، واکنگ ٹریلز، منی گالف اور اسٹیڈیم کے ساتھ ایک خوب صورت پارک اس شہر کی رونق بڑھانے میں اہم سمجھے جاتے ہیں، پھر ایک خوب صورت جھیل ڈیئر لیک Deer Lake جہاں کشتی رانی، واکنگ ٹریکس جیسی تفریحی سہولیات موجود ہیں۔ برنابی ولیج میوزیم بھی لوگوں کو پسندیدگی کا سامان فراہم کرتا ہے سب سے بڑھ کر برنابی ماؤنٹین پارک ہے جو سطح سمندر سے 1,214 فٹ کی بلندی پر ہے جہاں سے سورج غروب ہونے کا دلکش نظارہ دیکھنے کا ایک اپنا ہی لطف ہے جس سے لوگ پوری طرح محظوظ ہوتے ہیں۔ اس کے علاوہ یہاں سے نیچے شہر کی بلند عمارتوں کے سلسلے کو دیکھنے کا مزہ بھی یقینا سب کو بہت بھاتا ہے۔ برنابی میں برنابی ولیج میوزیم 1920 کی دہائی کا تاریخی گاؤں دیکھنے کے قابل ہے جہاں پرانے دور کے لباس میں گائیڈز خوش آمدید کہتے نظر آتے ہیں۔ برنابی آرٹ گیلری ایک تاریخی حویلی میں قائم ہے جہاں کینیڈا کے فن پارے اور تصویری نمائش منعقد ہوتی ہیں۔ نیشنل میوزیم جاپانی اور کینیڈین تاریخ و ثقافت کا خوبصورت مرکز سائمن فریزر یونیورسٹی میں واقع عالمی نوادرات اور ثقافتی نمائشوں کا عجائب گھر سینٹرل ویلی گرین وے 24 کلو میٹر لمبا واکنگ اور سائیکلنگ راستہ ہے جو کئی پارکوں، جھیلوں اور اسٹیشنز کو آپس میں جوڑتا ہے۔
برنابی میں دو اہم تعلیمی ادارے ہیں جن میں ایک سائمن فریزر یونیورسٹی (SFU) اور دوسرا BCIT برٹش کولمبیا انسٹی ٹیوٹ آف ٹیکنالوجی شامل ہیں۔
سب سے بڑا فلم اسٹوڈیو بھی برنابی میں ہی موجود ہے۔ یہاں ہر طرح کے کلچرل ایونٹس منعقد کیا جاتے ہیں ، غرض یہ کہ برنابی میں حسن کی رنگینیوں کے ساتھ ساتھ تعلیمی معیار جدید خریداری اور قدیم ثقافت کے نمونے اس شہر کو ایک متنوع شہر بنانے میں اہم کردار ادا کرتے ہیں، یہاں کی زندگی بہت پرسکون اور خوب صورت ہے۔
برنابی درحقیقت ایک پرانا تاریخی شہر ہے جس کی تاریخ کی کہانی 1800 سے شروع ہوتی ہے۔ یہاں مقامی قبائل اور یورپی آبادکاروں کی آمد اور پھر وقت گزرنے کے ساتھ ساتھ اس علاقے میں ترقی کی رفتار میں اضافہ ہوتا رہا۔ یہ 1891 میں وجود میں آیا، 22 ستمبر 1992 میں اسے ڈسٹرکٹ میونسپلٹی قرار دیا گیا۔ برنابی لیک نام پر رکھا گیا کینیڈا میں اس شہر کو 22 واں درجہ حاصل ہے۔ برٹش کولمبیا میں اسے تیسری پوزیشن اور میٹرو وینکور میں بھی تیسری پوزیشن حاصل ہے۔ برنابی میں ایک بہت ہی بہترین شاپنگ مال ہے جو برٹش کولمبیا کا سب سے بڑا اور کینیڈا کا پانچواں بہترین شاپنگ مال ہے۔ یہ شہر ہالی وڈ نارتھ فلم انڈسٹری کے فروغ میں نمایاں کردار ادا کر رہا ہے کیوں کہ فلم اسٹوڈیو کے علاوہ ساؤنڈ Stages زیادہ تر اسی شہر میں واقع ہیں۔
برنابی کا نام ایک فری میسن رابرٹ برنابی کے نام پر رکھا گیا جو Legislator تھا اور 1859 میں پہ پہلے لینڈ کمشنر کا سیکریٹری بھی تھا۔ برنابی نے فریش واٹر لیک کا سروے کیا تو لینڈ کمشنر رچرڈ مودی نے اس کا نام برنابی لیک رکھ دیا۔ یہاں بی۔سی۔آئی۔ٹی 1960 میں قائم ہوا اور سائمن فریزر یونیورسٹی 1965 میں قائم ہوئی۔ یہ دونوں تعلیمی ادارے ہر لحاظ سے اچھی معیاری ساکھ رکھتے ہیں۔ سطح سمندر سے بلند ہونے کی وجہ سے اس شہر میں دوسرے قریبی شہروں کے مقابلے میں برف باری بھی دیکھنے کو ملتی ہے۔
اس چھوٹے سے شہر میں اچھے خاصے پارکس کی موجودگی واضح طور پر نظر آتی ہے۔ یہاں سینٹرل پارک، رابرٹ برنابی پارک، کنگسٹن پارک، برنابی ماؤنٹین، اسٹل کریک اور برنابی ریور، برنابی لیک ، ڈیئر لیک، اورPark Barnet Marine کا ہونا اس شہر کو سیاحوں کے لیے تفریح کے مواقع فراہم برنابی کرتے ہیں۔
برنابی ایک متحرک اور متنوع معیشت کا حامل شہر ہے جو اسے اقتصادی طور پر ممتاز کرتا ہے۔ اس کے علا وہ برنابی ہائی ٹیک کمپنیوں کا ایک مرکز بھی ہے ۔
برنابی کو اونچے اور قدآور درختوں کے لیے دنیا بھر میں شہرت حاصل ہے۔ یہاں کے جنگلات اور پارکس میں 100 میٹر تک اونچے درخت عام طور پر دیکھے جا سکتے ہیں۔ یہ درخت سیکڑوں سال پرانے بتائے جاتے ہیں۔ ان درختوں میں ایک درخت 1000 سال پرانا ہے، جس کے تحفظ کے لیے خصوصی اقدامات کیے گئے ہیں۔
